O Ensino perde pola mínima a ida ante o Campobasso (65-64)

O Durán Maquinaria Ensino deu comezou a súa andadura por Europa cunha derrota, pero coa moral alta. As lucenses caeron ante o Magnolia Campobasso por un axustado 65-64, despois de recuperar na segunda parte unha primeira metade frouxa.

O partido de volta será o definitorio. As xogadoras de Miguel Ángel Ortega están a unha vitoria de dous puntos de lograr a clasificación para a fase de grupos da EuroCup. Este duelo terá lugar no Pazo dos Deportes de Lugo, o vindeiro 30 de setembro. Un momento histórico para o club galego que, tal e como sinalaba Manuel Durán a asnosas.gal, é “algo diferente e ilusionante. É un reto”.

Manuel Durán: “O Ensino está facendo un gran esforzo para levar o nome de Lugo e Galicia por Europa”

O Ensino aprende a calmar os nervios

Nos primeiros minutos dun partido histórico para ambos conxuntos, podía verse no parqué italiano a dez xogadoras nerviosas e emocionadas polo seu debut na competición europea. Os dous equipos cometían fallos en ataque, aínda que as italianas aproveitaron o factor campo e o alento do seu público para adiantarse no marcador.

O balón cambiaba rapidamente de mans, pero pasado o ecuador do primeiro cuarto as locais vencían por un 7-4. A vantaxe seguiu aumentando, pero as galegas do Ensino subiron o nivel da defensa, e cuns acertos máis baixo o aro reduciron distancias ata rematar no 14-10.

No segundo parcial, sobre a cancha do Campobasso o equipo de Ortega seguía sen atopar o ritmo en ataque, pero cunha orquestrada defensa evitaba unha aplastante vitoria das italianas de Sabatelli. Porén, foi nestes minutos cando as locais lograban o seu maior colchón de puntos, superando ás lucenses por un 23-12. O tempo de descanso chegou co 24-16.

Miguel Ángel Ortega co Ensino no partido ante o Campobasso / ENSINO

Tras o paso por vestiarios, puido verse a un Ensino renovado. As galegas sairon con confianza á pista, deixando os nervios atrás e dispostas a loitar polo resultado. Desta forma, as forzas igualáronse e co paso dos minutos as de Ortega comezaron a dominar na pista.

Pola súa banda, as de Sabatelli confiáranse na vantaxe obtida na primeira parte e baixaron o ritmo tras a pausa. Neste terceiro cuarto, as de Lugo iniciaron a remontada, chegando a colocarse por diante das locais. Cunha acertada Alba Prieto, as lucenses chegaron aos últimos dez minutos cunha vantaxe 40-44.

O Ensino perde pola mínima a ida ante o Campobasso (65-64) / ENSINO

O derradeiro tempo chegaba co resultado aberto. Con moito en xogo, ambos equipos deixáronno todo no parqué, e a vitoria cambiaba constantemente de mans. Finalmente, con tres tiros libres de Chagas, as italianas leváronse a primeira vitoria por un 65-64 final.

Miguel Ángel Ortega: “Mantivémonos xuntas en defensa e iso faime sentir moi ben”

FICHA TÉCNICA

LA MOLISANA MAGNOLIA CAMPOBASSO (65): Trimboli (2), Chagas (11), Parks (18), Nicolodi, Premasunac (9). Tamén xogaron: Quiñonez (17), Togliani (6), Egwoh (2), Amatori.

DURÁN MAQUINARIA ENSINO (64): Orsili (9), Martinez (15), Oma (3), Bahí Blanquera (10), White (6). Tamén xogaron: Lizarazu Herrera (3), Van den Edel (8), Silva (10), Erauncelamurguil, Aliaga Romero.

MARCADOR: 14-10; 24-16; 40-44; 65-64

ARBITRAXE: Sentürk e Tetik (Turquía), Lapanović (Eslovenia).

INCIDENCIAS: Partido clasificatorio para a fase de grupos da EuroCup celebrada en Campobasso ante 280 espectadores.