O adestrador do Durán Maquinaria Ensino, Carlos Cantero, xa apuntaba na previa do encontro que a Copa da Raíña non é unha prioridade para o equipo lucense e que prefire centrarse nos partidos. Agora, tras a derrota 77-74 contra o Alter Enersun Al-Qázeres Extremadura, as posibilidades de disputar o campionato alónxase aínda máis.
Cinco puntos separaban ás lucenses das extremeñas, penúltimas na táboa, antes do duelo da décimo terceira xornada. Unha distancia que, tras a vitoria, acurta o Al-Qázeres, que mantivo o nivel moi alto durante todo o encontro.
Os dous partidos nun do Ensino
“Semella que volvemos especular co partido. Outra vez vivimos dous partidos diferentes, un na primeira parte e outro na segunda”, reflexionaba o adestrador do conxunto de Lugo, Carlos Cantero.
Os primeiros minutos foron dominados polo conxunto local, que se adiantaba con facilidade no marcador ata lograr un 28-21 á fin do primeiro parcial. A unidade e fortaleza do equipo extremeño complicoulle o encontro ao Ensino, que tardou en reaccionar.
A remontada non foi posible na primeira parte, aínda que as visitantes comezaron a achegarse ao Al-Qázeres no electrónico asinando un 45-41 ao tempo de descanso.
Cantero recoñece a súa insatisfacción co partido xogado polas súas baloncestistas no primeiro tempo, que o deixa “moi descontento co equipo, coa actitude e coa intensidade defensiva sobre todo das exteriores”. Porén, “os axustes tácticos funcionaron cara a segunda parte”, que tamén foi un vaivén de puntos.
As lucenses comezaron a recortar distancias e por primeira vez adiantáronse no marcador. O terceiro cuarto serviu para que as visitantes se puxeran por diante con cinco puntos de diferenza, que perderon nos últimos dez minutos. Un final de infarto, que decantou o último cuarto para as locais cun 22-14 no luminoso e tamén así o partido, deixando os dous puntos en Cáceres, por unha mínima diferenza de tres puntos.
Carlos Cantero: “Cando xogas a especular un partido, vinte minutos si, vinte non, o resultado pode caer dos dous lados, pero desta vez caeu do lado rival”
O acerto de Christinaki para o Al-Qázeres desde a liña de tiro libre impediu a vitoria lucense a dúas xornadas da fin da primeira volta. “O desastre da primeira parte”, como o califica o técnico lucense, castigou ás xogadoras do Ensino, que tras esta xornada quedan na novena posición, con 18 puntos.
“Cando xogas a especular un partido, vinte minutos si, vinte non, o resultado pode caer dos dous lados, pero desta vez caeu do lado rival”, resumiu o adestrador.
As dúas xogadoras mellor valoradas da cita foron Eleanna Christinaki para o conxunto local e Vega Gimeno para o visitante, ambas con 28 créditos de valoración. Christinaki foi ademais a máxima anotadora do encontro, con 25 puntos, seguida por Gimeno, con 23, quen sumou tamén seis rebotes.
Así mismo, Vega Gimeno foi elixida como a MVP da afección lucense do encontro, segundo informa a conta de Twitter do propio club.
Vosotras la habéis elegido, @vegagimeno es la MVP de la afición del partido de ayer.
🏹 23 Puntos, 6 Rebotes, 1 Tapón y 3 Faltas recibidas para 28 de VAL.#SomosEnsino pic.twitter.com/fP3js8vIA4
— Ensino Lugo (@EnsinoLugoCB) November 28, 2020
Para a próxima cita, o Ensino enfrontarase a un rival da súa Liga, o Kutxabank Araski, que sitúase, cun partido menos, a dous posicións por debaixo das xogadoras de Cantero. O encontro terá lugar en Lugo, o venres, 4 de decembro, ás 20:30 horas.
FICHA TÉCNICA
77) ALTER ENERSUN AL-QÁZERES EXTREMADURA: Christinaki (25), Hart (7), Aydin (13), Hittner (15), Fasoula (2) -quinteto inicial-. Tamén xogaron: Victoria Llorente (8), Hatchi (4) e Lahuerta (3).
74) DURÁN MAQUINARIA ENSINO: Hempe (16), Stanacev (11), Gimeno (23), Aliaga (8), Prieto (5) -quinteto inicial-. Tamén xogaron: Van Den Adel (1), White (7) e Bogicevic (3).
PARCIAIS: 28-21, 17-20, 10-19 e 22-14
ÁRBITROS: Enrique Miguel López Herrada, María Ángeles García Crespo e Rodrigo Palanca Page. Eliminaron por cinco faltas persoales a Laura Aliaga, do Ensino.
INCIDENCIAS: Partido correspondente á décimo terceira xornada de Liga Femenina Endesa, disputado no pavillón Multiusos Ciudad de Cáceres.
