Este mércores, o Durán Maquinaria Ensino recuperou a segunda xornada ligueria que o enfrontaba ao Campus Promete en Logroño. Sobre o terreo de xogo ambos equipos mostraron unha igualdade máxima, resolvendo o partido tras dúas prórrogas (84-77).
Con esta derrota, a primeira do curso para as galegas, deixa ao Ensino en terceira posición, con cinco puntos, mentres que o Campus Promete marcha décimo con catro.
Remontada lucense
Nos primeiros momentos de partido o Ensino acusou o cansancio acumulado dunhas semanas intensas, así como as faltas importantes no equipo, deixando ao conxunto local dominar o encontro. Á baixa de Tamara Abalde sumáronse as de Alba Prieto e Orsili.
Malia estas faltas, xogadoras tocadas pero que puideron xogar como Helena Oma lideraron o equipo. Nos primeiros compases, o encontro xa se prevía igualado, pero o cadro local impúxose pasado o ecuador do parcial, con Jovana Nogic como xogadora estrela, rematando no 17-10.
No seguinte tempo, as de Logroño seguiron ampliando a súa vantaxe, cun Ensino que evitaba que a distancia medrase pero sen éxito nos ataques. O bo facer de Oma e Erauncetamurgil non era suficiente para controlar ao Campus Promete, que chegou ao descanso cunha vantaxe de once puntos.
Tras a reanudación, o equipo de Ortega comezou a reaccionar. O cadro local saiu forte, acadando unha distancia de 15 puntos coas galegas, pero estas non ían deixar marchar o partido facilmente. Co paso dos minutos, o Ensino foi acertando máis nos tiros, liderados por Lizarazu, iniciando a remontada e deixando ao rival a cinco puntos.
Nos, en principio, dez minutos finais, a tensión palpábase na pista logroñesa. As canastras alternábanse entre dous equipos que apostaban pola vitoria, cun Ensino cada vez máis loitador facendo fronte a un Campus Promete que non baixaba os brazos. O pitido final chegou coas táboas no 64-64 obrigando á prórroga.
Tensión final
Pero neste primeiro tempo extra tampouco se resolveu o encontro. As xogadoras de Lugo facíanse co dominio do partido no parqué, pero as locais apuraban para non deixar escapar cada ocasión. Así, cun 9-9, foi necesaria unha segunda prórroga.
Con máis de 40 minutos ás súas costas, as galegas comezaron a ceder ante a presión de xogadoras como Kovacevic ou Ayuso. Cun 11-4 final, a vitoria quedou en Logroño.
A xogadora do Ensino mellor valorada do encontro foi Lizarazu, con 16 créditos de valoración e 13 puntos. Seguiuna con 15 Helena Oma.
FICHA TÉCNICA
CAMPUS PROMETE: Ayuso (9), Estebas (16), Knecevic, Burani (6), Geldof (14) -quinteto inicial-. Tamén xogaron: Lahuerta 82), Alarcón (5), Nogic (22) e Kovacevic (14).
DURÁN MAQUINARIA ENSINO: Lizarazu (13), Erauncetamurgil (6), Bahi (9), Oma (19), White (5) -quinteto inicial-. Tamén xogaron: Van del Adel (6), Aliaga (6), Gomes (11) e Aldea (2).
MARCADOR: 17-10, 21-17, 13-19, 13-18, 9-9, 11-4
ARBITRAXE: Muñoz, Esteve e Villanueva
INCIDENCIAS: Partido da segunda xornada da LF Endesa disputada no Palacio de los Deportes de Logroño.
