O Ensino loita pero non pode co Perfumerías Avenida (82-51)

O Durán Maquinaria Ensino tiña un reto maiúsculo por diante nos cuartos de final da Copa da Raíña. Un dos mellores equipos de España e de Europa, o Perfumerías Avenida, foi o rival das galegas nun partido que rematan con motivos para o orgullo (82-51). Con este resultado remata a aventura das de Cantero nesta competición.

“Marchamos coa cabeza moi alta por ter podido competir contra o Salamanca como o fixemos”, declaraba Aliaga en rolda de prensa. O conxunto salmantino fixo gala de por que arrasan por onde pasan, pero as lucenses non se amedrentaron e loitaron dignamente.

Man a man nos primeiros minutos

O Ensino chegaba a este enfrontamento plenamente consciente do talento do rival, pero motivadas para competir. Por iso, as galegas saltaron á pista coa ilusión de disputar un torneo como a Copa da Raíña e concentradas para dar a súa mellor imaxe.

Perfumerías Avenida vs Ensino en Copa 21 / ALBERTO NEVADO - FEB — Perfumerías Avenida vs Ensino en Copa 21 / ALBERTO NEVADO – FEB

Así foi durante os primeiros minutos de partido. O conxunto dirixido por Carlos Cantero golpeou primeiro, cun excelente parcial 0-4 que as situaba momentáneamente á cabeza. O Perfumerías Avenida non ía deixar que un rival “menor” lle pasase por riba, e da man dunha perigosa Katie Lou Samuelson, sumado á saída de Hempe da pista por lesión, superaban ás galegas.

O marcador sinalaba o 11-6, pero isto non desanimaba ao Ensino, que seguiu presionando para sumar máis puntos e achegarse ao seu rival. Así foi ata chegar ao 17-12, co que finalizaría o primeiro cuarto de partido.

Segundo cuarto demoledor

A intensidade mantívose cara ao segundo cuarto, pero a enerxía comezaba a desaparecer no bando galego. O Perfumerías Avenida, con rotacións máis amplas, agotaba ao equipo de Lugo e aproveitaba o seu cansancio para romper o partido.

Dous triplos seguidos de Katie poñían unha distancia de once puntos co Ensino, que tiña cada vez máis problemas para transformar os tiros.

O marcador por parte das galegas estaba case conxelado. Só 8 puntos entraron neste tempo previo ao descanso, grazas a accións individuais de Helena Oma e Aleksandra Stanacev.

Pouco puideron facer as de Cantero para frear ás salmantinas, que chegaban ao ecuador do encontro cun 38-20 a favor.

O Ensino que fai soñar

Na segunda parte o cadro galego, lonxe de deixarse vencer, saltou á cancha máis forte e concentrado, disposto a soñar cunha remontada.

Porén, o Perfumerías Avenida, consciente do perigo lucense, non baixou o ritmo en ningún momento e mantivo sempre o seu acerto anotador e a súa consistente defensa.

O Ensino seguía intentándoo, pero o terceiro cuarto seguíu unha narrativa moi similar ao segundo, polo que a brecha entre ambos conxuntos non facía máis que aumentar.

Chegadas aos últimos dez minutos, as salmantinas duplicaban a anotación das de Lugo (63-31).

Pero no último cuarto as galegas seguiron soñando. Deixándose a pel na pista, as de Cantero lograron vencer por primeira vez nun cuarto ao Perfumerías Avenida, pero quedando sempre lonxe do empate ou a vitoria.

Malia a derrota, co 82-51 final, o Ensino volve a terras lucenses con motivos de sobra para estar orgulloso do seu traballo na Copa e afrontar con grandes sensacións o tramo final de Liga Endesa.

🏆 #CopaReinaLFEndesa 1/4
🏀 Final, final finaaaal@CBAvenida [82] – [51] 🚜 Ensino
👏🏻👏🏻👏🏻👏🏻 Hoy TODAS son las MVP del partido por hacernos soñar siempre. #SomosEnsino | #VoltaráLoita @DuranMaquinaria @Cafescandelas @SomosABANCA pic.twitter.com/uyIyx0dSSu
— Ensino Lugo (@EnsinoLugoCB) March 4, 2021

A MVP do partido foi a xogadora do Perfumerías Avenida Katie Samuelson, pero no bando lucense destacou Stanacev, con 14 créditos valorativos. A xogadora do Ensino foi autora de 12 tantos e cinco rebotes.

A valoración de Cantero, Aliaga e Gimeno

O técnico lucense mostrouse orgulloso das súas, e destacou os primeiros doce minutos de partido, nos que o Ensino mantivo o pulso coas todopoderosas salmantinas.

Porén, consciente do menor nivel do seu plantel, recoñeceu que “en moitas situacións de ataque, aínda que finalizabamos ben, chegabamos coas forzas moi xustas”.

Tamén destacou a evolución das súas xogadoras cara a segunda parte, na que xogaron “máis serias, máis regulares a nivel mental e en ataque e defensa”. Unha fórmula que non foi suficiente para contrarrestar o talento individual do rival, un equipo “moi completo”.

Vega Gimeno: “Tes que manterte con boa actitude. Isto é co que nos temos que quedar para meternos nos play offs, que son o noso seguinte obxectivo”

Vega Gimeno coincide coas valoracións do seu adestrador e sinala os erros nos fallos en rebote e concederlle ocasións a un Perfumerías Avenida que non perdoa. “Ao final non son partidos fáciles, se te poñen en contra moi pronto e levantalos é moi complicado. O que tes que facer é manterte con boa actitude, que creo que é o que fixemos. Isto é co que nos temos que quedar para o que resta de tempada e meternos nos play offs, que son o noso seguinte obxectivo”, reflexionou a xogadora.

Laura Aliaga: “Non tivemos tanto acerto como queriamos, pero lles plantamos cara”

Pola súa parte, a súa compañeira Laura Aliaga destacou o talento do rival, “que ten unha gran calidade e o está demostrando en Liga”. Porén, alaba ao seu equipo, xa que “ao mellor non tivemos tanto acerto como queriamos, pero lles plantamos cara”. Seguinte meta: “levarnos esta experiencia e a pensar na Liga”.

A galería fotográfica do Ensino en Copa

1 de 26

- +