A tempada aínda non rematou, pero o Durán Maquinaria Ensino acusa o cansancio e desconcentración que fai que non poida contra equipos a priori inferiores. Este foi o caso ante o Campus Promete, que se xoga a permanencia, e venceu ás lucenses 78-72.
Grazas ao traballo realizado en xornadas anteriores na Liga Feminina Endesa, as galegas afrontan este tramo final coa tranquilidade de ter a categoría salvada e coa posibilidade de rematar entre os de arriba. Pero este estado é un arma de dobre filo xa que, como xa sucedeu ante o Bembibre, “estes equipos mostran unha actitude e unha intensidade máis seria que os que estamos pelexando polo playoff“, sinala Carlos Cantero.
Catro puntos e seis posicións eran a distancia entre galegas e rioxanas antes de disputar o seu encontro da segunda volta. Coa vitoria para as segundas, a diferenza redúcese a tres puntos, pero ambos manteñen os seus postos: sétimo para o Ensino e 13ª para o Campus Promete.
O Ensino perseguiu ao Promete pero non o alcanzou
As locais nesta xornada xogábanse a vida, tendo que asinar unha vitoria en casa para seguir vivas na loita por non descender a LF2.
Así, o Promete liderou o partido nos dez primeiros minutos, nos que o Ensino apretaba pero non agarraba ás rivais. Nos tres primeiros minutos as rioxanas gañaban xa de tres puntos, unha renda que se mantivo ao longo dos dez minutos para rematar aumetnando ata os catro no final (18-14).
Coa tarefa de remontar o resultado e recuperarse dun mal inicio de partido, as de Cantero saíron á pista. Porén, de novo, as locais golpearon primeiro, índose aos cinco puntos de diferenza, e coas lucenses sen atopar o seu xogo.
Ao borde do descanso, cando faltaban vinte segundos para chegar ao ecuador do partido, o Ensino por fin recuperou sensacións e asinou un parcial 0-5, que non lle serviu para irse a vestiarios por diante (32-26).
As galegas necesitaban unha pausa para recompoñerse e así o demostraron sobre o parqué. O conxunto de Cantero saltou á cancha máis concentrado, o que se traduxo no seu xogo.
Segunda metade frenética
Con maior acerto que na primeira parte, as lucenses lograron colocarse por diante momentáneamente, no 42-43. O terceiro cuarto foi un pulso entre ambos equipos. A menos de medio minuto para o seu remate, as locais gañaban só dun punto, e o Ensino presionaba para chegar ao tempo final por diante.
Porén, o acerto de Paula Estebas foi moi determinante. Cun 2+1 situaba ao seu equipo nos segundos finais a catro de distancia das galegas, que sumaron dous puntos na xogada seguinte da man de Aliaga. Xa a contrareloxo, o Promete meteu de dous sobre a bocina, rematando no 52-49 a seu avor, pero que deixaba o resultado aberto para o tempo final.
♀ #LFEndesa | La MAGIA de la #LFEndesa
Paula Estebas, @laura_aliaga12 y @L_Littles, protagonistas de un final de 3⃣ cuarto ESPECTACULAR en el @CDPromete 🆚 @EnsinoLugoCB 🔥 pic.twitter.com/2sxMKn7YgM
— Baloncesto España (@BaloncestoESP) February 28, 2021
As esperanzas de remontada desvanecéronse xa no último cuarto. O Promete entrou neste tramo final aumentando a súa renda a costa das galegas, que non lograban reaccionar ante o xogo local.
Con todo, Vega Gimeno volveu enchufar ao seu equipo con sete puntos seguidos, que poñían o marcador nun 60-58 prometedor para o Ensino. As rioxanas íanse de novo no marcador e tras un triplo de Stanacev que mantiña as posibilidades galegas, o Promete asinaba catro puntos a pouco máis dun par de minutos para o final.
Cantero parou entón o reloxo, dando instruccións ás súas pupilas que estaban xa a sete puntos do rival. Tras o seu discurso entraron tres puntos do Ensino, que reducía distancias de novo con dous puntos de Aliaga.
De novo, como xa sucedera no terceiro cuarto, os segundos finais foron frenéticos. Quedaban vinte segundos para o remate do partido e as locais gañaban xa de cinco.
Nos instantes finais o partido foi un vaivén de canastras. Cando o Ensino se colocaba a tres, o Promete respondía cun tiro acertado. Porén, o marcador conxelouse para as visitantes nos 72 puntos, fronte aos 78 finais das rioxanas, que deixaron os puntos da vitoria en casa.
A valoración de Cantero
“Fumos a remolque practicamente todo o partido”, analizaba o adestrador lucense no post partido. Carlos Cantero sinalou a falta de acerto das súas xogadoras baixo o aro e desde a liña de tiro libre, unha área na que noutras ocasións son un conxunto constante.
Carlos Cantero: “Hai que faceles ver que a tempada non rematou, que sigue e que agora ao final é cando hai que apretar”
Ao final, a derrota explícase por “moitos detalles que nos deixan outra vez na liña de que hai que seguir traballando e de que no plano mental hai que faceles ver que a tempada non rematou, que sigue e que agora ao final é cando hai que apretar”.
FICHA TÉCNICA
78) CAMPUS PROMETE: Weaver (20), Estebas (10), Diarra (4), Nogic (7) e Flores (18) -cinco inicial-. Tamén xogaron: Barneda (4), Knezevic (9), Alarcón (5) e Kovacevic (1).
72) DURÁN MAQUINARIA ENSINO: Aleksandra Stanacev (14), Alba Prieto (-), Helena Oma (4), Vega Gimeno (11), Merritt Hempe (13) -cinco inicial-. Tamén xogaron: Bea Sánchez (12), Laura Aliaga (16), Chatrice White (2) e Marta Blanco (-).
PARCIAIS: 18-14; 14-12; 20-23; 26-23.
ÁRBITROS: García León, Terreros San Miguel e Colomer Castello.
INCIDENCIAS: Partido correspondente á xornada 27 da Liga Femenina Endesa disputado no Palacio de los Deportes de La Rioja.
