O Durán Maquinaria Ensino comeza con mal pé o 2022, perdendo claramente ante o Spar Girona (76-56) cunha mala primeira parte.
Á fin do encontro, o adestrador Miguel Ángel Ortega pasou por rolda de prensa, asegurando que as catalanas “teñen un poderío físico e a nós cústannos xogar a esa intensidade” pero asegurou estar “satisfeito con cousas que fixemos hoxe”.
O Ensino segue a recuperarse paulatinamente
A 15ª xornada da LF Endesa enfrontaba ás galegas cun conxunto catalán que chegaba con 25 puntos e no podio da categoría, ocupando a terceira posición con só tres derrotas no que vai de tempada.
O partido comezou coas forzas máis igualadas, e unha lixeria vantaxe no marcador para as visitantes, pero o Spar Girona non tardaría en tomar o control do partido. Con Magali Mendy liderando o apartado anotador entre as locais, o club catalán facíase co primeiro cuarto malia o acerto de Sofía da Silva baixo o aro.
No segundo cuarto, as xogadoras locais aproveitaron para aumentar o seu colchón de puntos, sendo superiores nos rebotes e nos tiros de campo, ante un Ensino sen ideas e con erros en ataque e defensa. O acerto de Gardner entre as catalás serviu para botar por terra as esperanzas de vitoria das galegas. O descanso chegaría co 46-29.
Tras o descanso, unha gran White non lograba facerlle sombra ás locais. O club galego soubo reducir distancias, pero non o suficiente como para poñer en perigo a vitoria do Spar Girona.
Nos derradeiros dez minutos, Burke e Gardner encargáronse de manter a raia ás galegas, que loitaban por abrirse paso no marcador. As forzas das lucenses remataron pasado o ecuador deste último cuarto, e sen opcións de remontada, o encontro rematou nun 76-56.
O conxunto lucense é, xunto co Campus Promete, o que acumula máis derrotas consecutivas, un total de catro partidos seguidos sen vencer.Con este resultado o equipo ocupa a undécima posición con 19 puntos.
Ortega móstrase optimista
Nas súas declaracións no pospartido, Ortega afirmou que “se nos mantemos na nosa liña, cada día xogamos un pouco mellor. Temos algunhas situacións como lesións, xogadoras que non puideron vir…”.
Unha das pezas clave que aínda non está ao 100% é Helena Oma, quen só pode xogar 15-20 minutos por partido: “Para nós Helena é unha xogadora importante. Iso é o que temos que ir restablecendo, pero en liñas xerais estou contento. Creo que para o meu gusto, pola miña forma de entender o xogo, defensivamente deberíamos mellorar”, concluiu.
Valoración del partido de Miguel Ángel Ortega 👇🎥 pic.twitter.com/6c2ZfywyZc
— Ensino Lugo (@EnsinoLugoCB) January 4, 2022
FICHA TÉCNICA
SPAR GIRONA: Palau (6), Drammeh (4), Burke (18), Gardner (13) y Resingerova (9) — cinco inicial—. Tamén xogaron: Onyenwere (10), Mendy (10) e Laia Flores (6).
DURÁN MAQUINARIA ENSINO: Alba Prieto (3), Alessandra Orsili (5), Helena Oma (6), Sofía Da Silva (8) y Chatrice White (17) — quinteto inicial—. Tamén xogaron: Giorgina Bahí (2), Natalie Van den Adel (7), Laura Aliaga (6) e Marina Lizarazu (2).
MARCADOR: 16-12, 30-17, 17-18 e 13-9.
ARBITRAXE: Morales Ruiz, Franquesa Vázquez e García Crespo.
INCIDENICAS: Partido correspondente á 15ª xornada da LF Endesa.
