O ano comeza pronto para o Durán Maquinaria Ensino, que o domingo, 3 de xaneiro ás 18:00 horas, xa volta ao parqué do Pazo dos Deportes de Lugo para recibir ás 18:00 horas ao Lointek Gernika Bizkaia nunha nova xornada da Liga Feminina Endesa.
Cun fin de ano de celebración entre a consecución dun posto na Copa da Raíña e unha remontada na prórroga no último partido do 2020, as xogadoras do Ensino e o seu adestrador, Carlos Cantero, teñen motivos de sobra para chegar con confianza ao seguinte reto.
As de Lugo chegan na oitava posición da táboa, tras lograr oito vitorias en 18 partidos, o que as deixa con 26 puntos. O cadro de Cantero ten unha das súas fortalezas desde a liña de tiro libre, onde non fallan en case 8 de cada 10 tiros e onde Vega Gimeno coróase como a raíña da Liga Endesa, cunha media de acerto de máis do 90%.
Tampouco o fan nada mal desde os tiros de campo, cun acerto do case 43%, con grandes anotadoras como Merrit Hempe, a cuarta mellor da competición, ou Gimeno, a máxima anotadora española da categoría.
O técnico das galegas aprendeu a lección con respecto ao partido da primeira volta e apunta, entre dos obxectivos para este encontro coas quintas clasificadas: “mellorar principalmente, nas canastras doadas, situacións de pick and roll, transicións ofensivas e contraataques”.
Carlos Cantero quere mellorar as “situacións de pick and roll” diante do Gernika
Para o partido ante o Lointek, as galegas deberán atender a baloncestistas como Angela Bjorklund, quen con 218 puntos é a máxima anotadora do club vasco, ou a Belén Arrojo, MVP do duelo ante o SPAR Girona. Con dúas vitorias máis que as lucenses, o cadro vasco ocupa a quinta posición da táboa.
Vega Gimeno, parte do quinteto ideal da 18ª xornada
Entre as filas do plantel de Carlos Cantero está Vega Gimeno, a MVP do último partido do Ensino e cuarta mellor xogadora da 18ª xornada, entrando así no quinteto ideal.
A súa gran actuación no partido ante IDK Euskotren logrou forzar unha prórroga no último segundo, que finalmente lles serviría para levarse o partido.
Gimeno está nun momento moi bo da súa carreira profesional e no Ensino. A española ocupa a sexta posición das xogadoras mellor valoradas da categoría, sendo a única de España no top 10.
⛹️♀️ MVP #LFEndesa: @vegagimeno, el MVP de la sangre fría, en el momento más caliente para el @EnsinoLugoCB
🎙 “La clave está en llegar muy motivadas a cada partido”
📊 38 val: 28 puntos, 7 rebotes, 2 recuperaciones y 8 faltas rec.
🖐 Quinteto ideal ⬇https://t.co/yjKnrebJ0W pic.twitter.com/4lULXle8RU
— CompeticionesFEB (@CompeticionFEB) December 28, 2020
Nas bancadas, o Durán Maquinaria Ensino poderá contar con afección chegada de toda a provincia. Así o permiten as restriccións vixentes neste momento por mor da pandemia de COVID-19.
