O Ensino escríbese con E de Europa

Obxectivo conseguido. O Durán Maquinaria Ensino xogábase o seu futuro en Europa no Pazo dos Deportes de Lugo, e o equipo e a afección local non defraudaron. As galegas venceron ao Magnolia Campobasso por un 66-55, logrando así o pase á fase de grupos da EuroCup.

O equipo de Miguel Ángel Ortega chegaba ao encontro de volta nesta previa á fase de grupos tocado. A internacional Tamara Abalde ou Alba Prieto, xogadora destacada na ida, causaban baixa, pero o planel do Ensino soubo sobrepoñerse aos obstáculos tirando da defensa. “Defendimos moi ben. Creo que o esforzo defensivo foi moi grande”, aseguraba o adestrador na análise do partido.

As dúbidas sobrevoaban ao club antes do partido trascendental ante o Campobasso, e tal e como indica o preparador “había moita ilusión. Gustaríanos ter chegado máis adestradas e con máis saúde e iso crea temor e inseguridade”. Porén, o resultado foi positivo e o Ensino xa é de Europa. “Estamos todos moi contentos. Estou moi contento co que o equipo transmite, fixemos un esforzo moi grande”, subliña Ortega.

Buenos dias ‼️‼️‼️
No fue un sueño, es real, estamos en @EuroCupWomen ‼️‼️‼️
Dijimos que juntos llevaríamos Lugo por Europa, le demostramos a Europa lo que es Lugo, su baloncesto y su gente, especialmente su gente y el Pazo. Escribimos juntos esta historia. ‼️‼️‼️ pic.twitter.com/iVQ7wy1NEj
— Ensino Lugo (@EnsinoLugoCB) October 1, 2021

Noite histórica no Pazo

Os nervios estaban a flor de pel nun Ensino que se xogaba o seu futuro ante a súa xente no Pazo. A afección desde a bancada empurrou ao equipo desde o minuto un de partido, actuando como unha sexta xogadora no parqué lucense.

Nos primeiros segundos os balón cambiaba de mans, entre dous clubs con moito en xogo. Porén, as galegas puideron abrir a lata, cun triple de Chatrice White a pase de Alessandra Orsili. A italiana sería unha das protagonistas da cita coas súas compatriotas como rivais.

O Ensino clasifícase para a EuroCup / FIBA

Georgina Bahí seguiu sumando puntos para as locais, que en cuestión de tres minutos lograran asinar xa un parcial 7-0. O público apoiaba ao seu equipo en cada pase, movendo o balón coas xogadoras cos seus gritos nas bancadas. A primeira canastra das italianas chegou preto do ecuador do primeiro parcial, cun tiro certeiro da croata Nina Premasunac, pero a defensa das locais seguiu impedindo que o Campobasso recortara distancias.

Co acerto de Bahí apoiada por Sofía da Silva e Marina Lizarazu, o Ensino seguiu medrando ata lograr un colchón de 11 puntos que mantivo ata os minutos finais, nos que un tiro de Parks nas italianas deixaba o electrónico no 19-10.

No segundo cuarto o equipo de Sabatelli aumentou o ritmo recortando distancias. Ortega fixo entón un triplo cambio, dando entrada de novo á pista a Bahi, Oma e White, apostando por unha forte defensa que xa dera bos resultados no partido de ida. Na segunda metade deste segundo cuarto Parks, Quiñonez e Premasunac lideraban ás visitantes á remontada, pero a superioridade seguía no bando local. O tempo rematou nun tranquilizados 37-24.

O Ensino clasifícase para a EuroCup / ENSINO

Despois do paso por vestiarios, o partido tardou en arrincar, con dous equipos moi serios en defensa e con dificultades para anotar. As de Sabatelli sabían que aínda tiñan posibilidades de levarse a vitoria, e subiron a marcha para poñer ao Ensino contra as cordas.

Pasados tres minutos desde a reanudación, os tiros libres anotados por Nicolodi deron paso a unha efectividade total das italianas. Togliani e Premasunac puxeron en apuros ás galegas, que reaccionaron anotando desde o tiro libre, o triple e os tiros de dous. Lonxe de acusar os nervios e a presión, as de Ortega souberon manexar o partido para manter un resultado favorecedor. A falta de dez minutos a vantaxe local era de 14 puntos.

No último cuarto semellaba que todo estaba xa decidido, pero as xogadoras do Ensino non podían confiarse ante un rival do talle do Campobasso. De novo unha defensa protagonista conxelou o marcador durante varios minutos.

Neste parcial, as italianas golpearon primeiro, advertindo do perigo que podían supoñer, e loitando por cada punto. Cando comezaron a coller ritmo, White paroulles os pés cun certeiro tiro que reactivaría ás galegas en ataque, aumentando a súa puntuación con Van den Adel e Oma. Malia os intentos das visitantes, as lucenses sempre estiveron a dez puntos ou máis por enriba, controlando o partido.

Finalmente, cun 66-55 a vitoria quedou en casa e o Ensino logrou o pase á EuroCup. Nas próximas semanas, as galegas xogarán no grupo do Valencia Basket e o Namur Basket e o Kangoeroes belgas.

FICHA TÉCNICA

ENSINO: Erauncetamurguil (1), Orsili (9), Bahi (16), Oma (7) e White (12). Tamén xogaron Lizarazu (5), Van den Adel (7), Aliaga (3), Silva (6).

CAMPOBASSO: Premasunac (8), Trimboli, Chagas (8), Nicolodi (8), Parks (15). Tamén xogaron: TOgliani (49, Quiñonez (10), Amatori, Srot e Chinenye (2).

MARCADOR: 19-10, 18-14, 15-14 e 14-17.

INCIDENCIAS: Partido de volta do clasificatorio á fase de grupos da EuroCup celebrado no Pazo dos Deportes de Lugo ante público.