Xogar entre semana séntalle ben aos clubs galegos da LF Endesa. Tanto o Durán Maquinaria Ensino como o BAXI Ferrol venceron en casa, derrotando ao Movistar Estudiantes e ao Zaragoza respectivamente.
Ademais, nos dous casos, as galegas asinaron un gran duelo na segunda parte dos seus partidos, cunha traxectoria ascendente que lles permitiu vencer con tranquilidade.
O Pazo leva ao Ensino cara a vitoria
En Lugo, o Ensino recibía a un Movistar Estudiantes perigoso, nun bo momento deportivo despois de ter plantado cara a rivais da zona alta. En palabras do adestrador do plantel galego, Fernán Varela, o conxunto local afronta xa cada partido “coma unha final“, e coa necesidade apremiante de sumar vitorias.
O duelo comezou de cara para as locais, que facían fronte ao baixo o aro das visitantes respondendo desde o tiro exterior. Con todo, as madrileñas adiantáronse no marcador, para colocarse a tres puntos das galegas á fin do primeiro cuarto.
No segundo o Ensino apretou en defensa, para deixarlle menos ocasións de canastra fácil ao Estudiantes, e reducir distancias cara a segunda metade. O descanso chegou cun axustadísimo 28-32.
Tras o paso por vestiarios, as lucenses colleron forza para saltar ao parqué do Pazo dispostas a levarse a vitoria. Orsili lideraba os ataques das lucenses para poñer ao seu equipo por diante tras a reanudación, pero as visitantes respondían coas canastras de Angelique. O poder comezaba a cambiar de mans e o estadio preparábase para a remontada galega.
Co apoio da afección na bancada, e os folgos da Peña Ensino, as galegas iniciaron o camiño á vitoria. A falta de dez minutos as locais perdían de dous puntos, pero non tardaron en dar a volta ao marcador para inclinar a balanza ao seu favor.
A través dun xogo coral, con Van den Adel e Sofia Gomes como xogadoras destacadas, as de Lugo abríanse paso no luminoso á vez que freaban desde a defensa ás visitantes. Cun 70-60 final, o Ensino puido festexar co seu público un triunfo importantísimo para seguir en LF Endesa.
Fernán Varela: “Conseguimos manter o nivel de dureza atrás e xogar con mellor ritmo”
O adestrador das lucenses explicou na súa análise do partido que malia que “o inicio non foi o que desexábamos, conseguimos manter o nivel de dureza atrás e xogar con mellor ritmo no terceiro e último cuarto”.
Esa foi a clave da vitoria do Ensino, que foi quen de manter o ritmo e non virse abaixo malia os certeiro tiros das rivais. Aínda así, Varela xa pensa nos puntos a mellorar e admite que “os adestradores non sei se estamos satisfeitos nunca. Teño na cabeza algunhas posesións que me fan máis dano a min que o que di a estatística. Pero fixemos un esforzo importante e esta é a liña que queremos seguir”.
Varela: “Fixemos un esforzo importante e esta é a liña que queremos seguir”
Neste encontro o conxunto galego atopou a solidez que lle faltaba noutros duelos, e “ao ser constantes nos momentos difíciles, no momento no que collemos vantaxe puidemos dominar o partido e estar máis cómodas na pista”. Iso, e os tiros libres, deron como resultado unha vitoria lucense.
Respecto á boa asistencia de público, Fernán Varela destacou que “é un pracer ver tanta xente e ter unha actitude correcta, que é o que queremos transmitirlles”.
⏰ FINAL FINAL EN EL PAZO ‼️‼️‼️‼️‼️‼️‼️‼️
Jornada 25 #LFEndesa
GRACIAS PAZO, GRACIAS CEIP CASÁS, GRACIAS @Ensinopenha @EnsinoLugoCB 7️⃣0️⃣@MovistarEstu 6️⃣0️⃣@laura_aliaga12 💯
📸@rebeca_1826 Rebeca Fernández #ActitudRío#VamosEnsino pic.twitter.com/evcZWp5tjE— Ensino Lugo (@EnsinoLugoCB) March 16, 2022
Dobre celebración en Ferrol
Na Malata, o BAXI Ferrol recibía ao Casademont Zaragoza, nun partido no que as ferrolás tiñan que facer fronte a un rival da zona media da táboa para dar un paso máis cara a salvación.
Cunha espectacular actuación, a vitoria quedou en casa, e as galegas sitúanse a un punto do 14º e 13º clasificado, e a dous do 12º, o Ensino, o que as mantén vivas na loita pola permanencia.
Ademais, o plantel universitario pode presumir de ter a unha das MVPs da xornada nas súas filas. Taylor Koenen foi, xunto a Dongue do Araski, a mellor valorada, con 28 créditos.
No partido, as forzas comezaron igualadas entre os dous conxuntos, sen que ningún deles dominara por completo. Entre as galegas, Koenen, Ivanovic e Allen repartíanse os puntos, mentres que Vega Gimeno lideraba ás visitantes.
Tras o empate 14-14 do primeiro cuarto, no segundo as ferrolás deron un golpe na mesa. Cun xogo coral, as locais tomaron a iniciativa para dominar tanto no triple como nos tiros de dous, marcando distancias co Zaragoza. O descanso chegou cun 33-24.
Despois da pausa, o dominio ferrolán non fixo máis que aumentar. O BAXI Ferrol xogaba cómodo na súa pista, marcando os tempos e deixando sen opcións claras de tiro ao conxunto visitante. De feito, o Zaragoza non se atoparía co aro ata pasado o ecuador do terceiro cuarto, mentres que a puntuación das galegas seguía aumentando.
No cuarto final, o cadro local deu o golpe final. Sen problemas en ataque e cunha defensa férrea, as ferrolás sentenciaron o encontro cun 74-49 final.
Lino López: “O equipo estivo de sobresaliente”
Ao remate do encontro, o adestrador Lino López recordaba como o equipo “necesitaba unha vitoria” e que a estas alturas de tempada “todos os partidos son finais e como tal hai que afrontalos, da igual o rival”.
No duelo, o BAXI estivo “de sobresaliente”, sobre todo no apartado defensivo, xogando cun “nivel alto de intensidade e concentración”. Incluso nos momentos duros, o conxunto foi quen de sacar o partido adiante, polo que o técnico asegura que “só se pode felicitar”.
Lino López: “Fumos capaces de que non se sentisen cómodas”
López destacou tamén que malia contar cunha “rotación tan cuarta e xogando tantos minutos contra un equipo como o Zaragoza, con xogadoras de nivel, fumos capaces de que non se sentisen cómodas”.
🎙Declaraciones de @linolopez04 tras el partido BAXI Ferrol @UniFerrol 74 – @CasademontZGZ 49#SienteelUni pic.twitter.com/234Q7OGZQ5
— Baxi Ferrol (@UniFerrol) March 16, 2022
