Non puido ser. O Durán Maquinaria Ensino vése obrigado a despedir a tempada tras unha derrota ante as todopoderosas xogadoras do Valencia Basket. O partido, celebrado en terras valencianas, enmarcábase nos cuartos da loita polo título, e rematou cun 82-54 para as locais.
“Fixemos un partido digno”, analiza o adestrador do cadro galego, Carlos Cantero. As lucenses chegaban en inferioridade en moitos aspectos a esta eliminatoria, tras pasar un confinamento pola COVID-19 e cun plantel de menores rotacións. Enfronte, un Valencia Basket capaz de todo e recentemente coroado como campión da Euro Cup.
A primeira metade foi a dun Ensino loitador
Con todo en contra e nada por perder, o Ensino saltou á pista valenciana con enerxía. O obxectivo era, non tanto superar os 11 puntos de diferenza da ida, senón rematar o curso cun bo sabor de boca.
Contra todo pronóstico, os primeiros minutos deste duelo estiveron marcados case pola igualdade, cun cadro taronja que levaba a vantaxe, pero sen moita diferenza.
O duelo comezou cun parcial contundente dun 10-0 a favor das laranxas, pero o triplo de Stanacev inaugurou o pulso e abriu a esparanza para as galegas, que tiraban de ilusión para aguantar ante un xigante como o Valencia. Presionando en cada balón, o Ensino logrou manterse metido no partido malia a súa inferioridade, quedando o primeiro cuarto nun 18-13.
Para o segundo tempo, as lucenses estaban moi motivadas para ir a pola remontada. Tanto foi así, que lograron situarse a cinco puntos por riba do rival, tendo a un par de tiros a oportunidade de darlle a volta á eliminatoria. Prieto desde o exterior e Hempe baixo aro lideraban ás visitantes.
Porén, o ataque do Valencia foi superior, e as taronjas volveron decantar o partido ao seu favor. O descanso chegaba cun axustadísimo 35-32 e coa tranquilidade local do colchón do partido de ida.
Os erros en rebote nas visitantes e o poderío de Trahan-Davies condicionaron a actuación do Ensino. “Non nos deixaban irnos, porque en canto collíamos a vantaxe de 5 ou 6 puntos a metían rápido a pista e enseguida sacaba rebotes ou algunhas canastra fácil”, explica Cantero sobre a 11 taronja, que sería a MVP do duelo.
O corpo non aguantou máis na segunda parte
Despois do descanso, as forzas comezaron a fraquear nas filas galegas, cun Ensino visiblemente vido a menos. Con só dúas xogadoras no banco, quitando a Vega Gimeno, presente pero sen posibilidade de disputar minutos, Cantero facía as rotacións posibles para manter a frescura no campo.
O curto plantel galego foi o maior hándicap para as xogadoras do Ensino, que no terceiro cuarto vían escapar calquera ilusión pola remontada. O Valencia aproveitou este tempo para romper o partido ao seu favor definitivamente.
Os triplos, entre eles os da ourensá e recentemente drafteada pola WNBA Raquel Carrera, aumentaban a diferenza entre ambos equipos.
“Hai un momento no que tiñamos que usar a zona porque en individual non chegabamos e coincidiu que entraron os triplos nunha zona que tiñamos pechada para evitar que correran e colleran rebotes. Entre cansancio e esa frustración de que metan de tres, os tiros fáciles tampouco entraban”, indica o adestrador lucense.
Cristina Ouviña desde a dirección e unha Celeste Trahan-Davies imparable marcaban o tempo do encontro, botando por terra os soños galegos. O último cuarto chegaba xa cun 60-46.
Pouco podían facer xa as de Cantero no cuarto final, que foi un “quero e non podo”. Cun Ensino vido a menos, as lucenses non tiñan forma de frear ao rival, que se abría camiño con moita facilidade para pasar a semifinais.
En definitiva, nesta segunda metade “aguantamos o que o físico permitiu”, declaraba Carlos Cantero. O técnico rematou o partido e tempada orgulloso das súas xogadoras por todo o conseguido.
O balance desta gran tempada queda lixeiramente ensombrecido por esta derrota final. Porén, cabe recordar que este é o segundo curso consecutivo no que as lucenses se clasifican como sétimas na LF Endesa e no que compiten na Copa da Raíña. Todo un logro para un Ensino que aínda ten moito camiño que percorrer.
⛹️♀️🏀Playoff #LFEndesa
👉O @EnsinoLugoCB pecha unha gran temporada malia perder 82-54 co @valenciabasket de @raquelcarrera_ ‼️
👏👏A ourensá foi felicitada polo equipo lugués tras o remate do encontro👏👏
(Vídeo sen audio 🙏🙏) pic.twitter.com/yIOVSpbKEe
— En Xogo tvG2 (@EnXogo_tvG2) April 16, 2021
FICHA TÉCNICA
82) VALENCIA BASKET CLUB: Cristina Ouviña (16), R. Allen (9), L. Romero (11), C. Trahan Davies (21) e M. Gulich (11) – quinteto inicial -. Tamén xogaron: Gómez (-), Segura (2), Casas (-), Juskaite (7), Carrera (5), Gil (-) e Pina (-).
54) DURÁN MAQUINARIA ENSINO: Hempe (10), Stanacev (5), Aliaga (5), Oma (3) e Sánchez (6) – quinteto inicial -. Tamén xogaron: Natalie Van den Adel (8) e White (7).
PARCIAIS: 18-13, 17-19, 25-14 e 22-8.
ÁRBITROS: José María Terreros, Antonio Manuel Zamora e Alberto Lázaro.
INCIDENCIAS: Partido correspondente á volta de cuartos de play-off disputada no pavillón municipal Fuente de San Luis.
