O Durán Maquinaria Ensino ten dous partidos por xogar esta semana, antes de disputar o ansiado play off. O primeiro destes duelos será este luns 22, ás 19:00 horas, ante o Valencia Basket, na que é a súa penúltima cita en casa e a recuperación da 23ª xornada.
As taronjas non serán un rival nada doado para as galegas. Esta tempada veñen de acadar unha clasificación histórica, entrando na Final Four da Eurocup, son o equipo en mellor racha competitiva con 14 vitorias consecutivas, e un dos favoritos a levarse o título da Liga Feminina Endesa.
Malia ascender no 2018, no mesmo ano que o Ensino, as valencianas compiten xa a nivel de equipos como Perfumerías Avenida ou SPAR Girona. Segundo explica o técnico lucense, Carlos Cantero, “o nivel da Liga subiu un montón”.
Pero iso, puntualiza, é algo que se nota “tanto nos equipos de arriba como os de abaixo, aumentando moitísimo a igualdade nos equipos da metade da táboa”. Por iso, cun Ensino tamén candidato a levarse o título, este partido prevese como emocionante e rifado.
Pulso galego – valenciano
As lucenses chegan na sétima posición da táboa, despois de dúas vitorias consecutivas e cos ánimos subidos tras ter acadado o obxectivo do play off. En total, o Ensino suma 42 puntos nun equilibrio de 14 derrotas e 14 vitorias.
Carlos Cantero: “Estamos eufóricas por acadar o obxectivo: estar no ‘play-off’”
Co trunfo ante o Kutxabank Araski, o Ensino vése capaz de seguir sumando de dous en dous malia as baixas rotacións que sofren. Este é un problema inexistente nas taronjas, que son “o conxunto coa rotación máis longa e é un equipo super completo”, segundo Cantero. O adestrador sinala que a baixa eficencia nos triplos compénsase no equipo de Valencia con xogadoras como Allen e “postes dun tremendo nivel”.
Carlos Cantero: “Os equipos fortes e que teñen competición europea non poden poñer a escusa de cansancio, lesións ou de carga de partidos”
Como o Ensino, as valencianas tamén teñen unha axenda apretada, pero o técnico galego considera que isto non debe ser escusa nun club deste nivel. “Ten equipo para rotar e xogar. Os equipos fortes e que teñen competición europea non poden poñer a escusa de cansancio, lesións ou de carga de partidos. Estes planteis están feitos para xogar 2 ou 3 partidos semanais”, asegura.
Por iso, Cantero recorda que o rival deste luns está a “pleno rendemento”, como deixan ver os seus últimos partidos disputados.
White reboteadora
Para este encontro, nas filas do Ensino estará unha vez máis Chatrice White. A pívot foi quen de acadar 18 rebotes no seu anterior partido, un aspecto que alaba o seu adestrador.
Carlos Cantero: “(White) Ten un instinto reboteador e uns brazos moi longos que lle axudan a defender”
“Ten un instinto reboteador e uns brazos moi longos que lle axudan a defender. En calquera pase elevado sempre toca eses balóns e dános robos de balón. Que collera 18 rebotes é marabilloso e nos viu xenial porque foi algo que dominamos ao longo do partido”, analiza Cantero.
Porén, denuncia que as estatísticas en xeral non están a ser moi fieis esta tempada. “Ves algún partido noso no que as xogadoras fixeron 13-15 rebotes e lles apuntaron 6. Esperemos que para o ano que vén o tema das estatísticas cambie”, recalca.
Porén, quen aínda non voltará ás pistas é Merritt Hempe. A baloncestista segue a recuperarse lentamente da súa lesión, e o técnico apunta que “xa a final de tempada as lesións non se recuperan á mesma velocidade”. Aínda así, Cantero quere facer unha lectura positiva, salientando que “é un punto a favor das demais xogadoras do equipo que, faltando a nosa mellor xogadora, sacamos vitorias importantes e metímonos no play off“.
Rival galega
Nas filas rivais desta xornada estará unha xogadora galega de moita proxección. Raquel Carrera está a perfilarse como unha promesa do baloncesto español.
En palabras de Cantero, “é unha mágoa que unha pívot galega e a este nivel non estea nun equipo galego, pero aínda así a verdade é que é unha xogadora que me gusta moito, ten moita progresión”.
As galegas tamén deberán facer fronte a Cristina Ouviña, unha das mellores bases españolas, aínda que o adestrador do Ensino posiciónase e asegura que prefire a Cazorla, “pero se Ouviña non é a mellor é a segunda”.
Carlos Cantero: “(Ouviña) Ten unha lectura de pick and roll, unha habilidade para pasar e unha capacidade defensiva que poucas máis teñen”
Con todo, é capaz de atoparlle algún aspecto a mellorar, como os lanzamentos de tres, pero asegura que “o suple noutras situacións. Ten unha lectura de pick and roll, unha habilidade para pasar e unha capacidade defensiva que poucas máis teñen”.
As persoas aboadas poderán apoiar ao Ensino no Pazo
Para este emocionante partido, as seguidoras do Ensino poderán acceder ao Pazo se contan cun abono. As entradas estarán dispoñibles contactando co club lucense.
Para o resto, o partido retransmitirase en directo vía streaming a través do Canal FEB.
