O Ensino da un paso adiante cara o play off na Liga 1

Nesta fase final da Liga Feminina Endesa, o Durán Maquinaria Ensino segue loitando por ter un posto no play off. Despois da vitoria desta 28ª xornada ante o Al-Qázeres (67-61), as lucenses están un paso máis preto.

Non foi un rival fácil. As extremeñas xóganse a permanencia, e viaxaron a Lugo coa intención de deixarse a pel na pista. Por iso, foron un conxunto que puxo en problemas a un Ensino que logrou vencer finalmente cun resultado axustado.

Carlos Cantero, adestrador das locais, definía o partido como un encontro “complicado, duro, moi regular, tanto delas como nós”.

Comezo igualado, con vitoria local ao descanso

A falta de tres xornadas para finalizar a primeira fase, todo está por decidir e o Pazo dos Deportes acolleu a dous clubs que se xogan moito. Por un lado, o Ensino soña con ser equipo de play off, polo outro, o Al-Qázeres quere evitar o pesadelo do descenso.

Así, as forzas estiveron completamente iguaaldas nos primeiros dez minutos, no que o marcador apenas se movía. O ritmo alto das visitantes marcaba o tempo, pero as lucenses mantíñanse na súa propia pista. As extremeñas parecía superiores, pero unha canastra de Stanacev sobre a bocina poñía o empate 14-14 á fin do primeiro cuarto.

Xa no segundo tempo, o Duran Maquinaria Ensino deu un golpe na mesa, con dous triplos (de Alba Prieto e Aliaga), que distanciaban ás de Carlos Cantero no marcador. Malia competir cun Al-Qázeres aínda forte, as galegas comezaban a diferenciarse no electrónico, facendo inservibles os esforzos visitantes.

O tempo de descanso chegou cun 41-30 no luminoso, indicando o maior nivel das locais, que non fallaban baixo o aro.

O Ensino viu perigar o trunfo pero afianzou os dous puntos

Pero, lonxe de virse abaixo, as extremeñas reaccionaron tras o paso por vestiarios, cun parcial 2-10 nos primeiros tres minutos desde a reanudación.

Carlos Cantero viuse obrigado a solicitar un tempo morto para solventar a presión visitante e facer reaccionar ás súas. O Ensino logrou recompoñerse, volvendo a situarse por riba, pero cun axustadísimo 49-44 a falta dos dez minutos finais.

No último cuarto, a vantaxe lucense desapareceu no ecuador, cando a falta de seis minutos as visitantes poñíanse a un de distancia despois de remontar unha renda de 13 puntos. De novo, Cantero parou o cronómetro para non deixar que as galegas quedaran bloqueadas, e reorganizar as súas filas de baixas rotacións.

As súas decisións xurdiron efecto. Tras a charla, Laura Aliaga asinou dous triplos que cambiaron a tónica do encontro. Unha vez máis, o Ensino mandaba en casa, e foi quen de facer un parcial 13-0.

“Comezaron a entrar os tiros, con boas lecturas en ataque”, recorda Cantero. Ao final, os esforzos das locais serviron para afianzar unha vitoria 67-61 “moi importante”, tanto pola situación na que chegaba o Ensino, como “a motivación do rival por saír da zona baixa”.

Dous puntos máis que se engaden ao casilleiro das galegas, que xa son sétimas con 40 puntos.

A galería fotográfica do Ensino – Al-Qázeres

1 de 8

- +