O CV Arenal Emevé ten este mércores o difícil reto por diante de manter as boas sensacións e resultados ante un dos rivais máis difíciles da categoría. As loitadoras reciben este 27 de xaneiro, ás 20:00 horas, ao CV Kiele.
As de Cidade Real non porán as cousas fáciles ás galegas. Actualmente contan con 27 puntos, froito de dez vitorias e dúas derrotas dun punto, que as deixan na cuarta posición. O Kiele é un equipo contundente en ataque, que se sitúa como o segundo con máis sets a favor da categoría.
Pola súa banda, o Emevé sitúase 17 puntos por debaixo, sendo terceiras pola cola. As lucenses son o equipo que máis puntos en contra recibe, chegando á cifra de 1340 tantos. Pero nas últimas citas, o xogo galego mellorou moito.
Na dobre visita ás canarias, contra dous dos mellores cadros da Liga Iberdrola, o Emevé foi quen de roubar un punto ao Sanaya Libbys La Laguna. Á semana seguinte, unha incríble remontada mereceulles a terceira vitoria da tempada, nesta ocasión contra o Dos Hermanas.
O Emevé perdeu a ida
Na primeira volta, as loitadoras trataron de ti a ti ao CV Kiele, pero o encontro escapóuselles. Cun resultado final de 3-1, o conxunto dirixido por José Valle tivo problemas na defensa para controlar ás entón locais.
Malia a superioridade galega nos bloqueos, os erros propios e o acerto imperdoable do Kiele en ataque foron motivo suficiente para que as loitadoras non lograsen rascar ningún punto.
Este partido da segunda volta disputarase en Lugo a porta pechada seguindo as últimas restricións sanitarias, pero poderá verse vía streaming a través de Youtube do Emevé.
O Emevé levase o partido ante o Dos Hermanas cunha espectacular remontada (2-3)
