A salvación numérica estaba a unha vitoria de distancia, pero o CV Arenal Emevé non sumou os tres puntos e deberá seguir loitando por permanecer na Liga Ibedrola de Voleibol. As canarias do CV Sayre CC La Ballena leváronse un partido vital por non descender cun resultado final dun 3-1.
Ao remate deste duelo, as lucenses ocupan a décima posición, con 14 puntos, dobrando ás colistas. Pola súa parte, as canarias están un posto por riba, con 16 puntos. Unha diferenza de dous puntos (os do trunfo do Sayre) determinada polos erros galegos, que lle concederon máis puntos ás locais.
A balanza inclinouse para o bando canario
Os primeiros compases do partido xa marcaron o ritmo igualado a ambos lados da rede, nun pulso que se mantería ao longo de todo o encontro.
Xa na previa do partido, Lucía Prol no equipo galego era unha das xogadoras máis destacadas e en mellor estado de forma. Así o demostrou nos primeiros minutos, logrando que o Emevé asinase o primeiro parcial xunto con Audrey Alford, o que lles daba unha lixeira vantaxe 5-8.
As lucenses mantiveron a súa superioridade ao longo de case todo o primeiro set, ata o 20-20, no que as canarias as igualaron. Malia os acertos no bando local, as galegas reaccionaron tras un tempo morto solicitado por José Valle e volveron colocarse por riba cun 21-23.
Pero xusto cando a primeira manga semellaba decidida, o Sayre aproveitou tres erros consecutivos de ataque das visitantes, levándose o primeiro tempo por un 27-25.
Esta vitoria momentánea deixou tocadas ás de Valle, que non lograban repoñerse na segunda manga. De novo, os erros do Emevé aumentaban o marcador rival, sen que as loitadoras foran quen de igualalas.
Wanda nas filas do Sayre foi a principal encargada de situar ao seu equipo por diante, cunha distancia que as loitadoras non eran capaces de reducir. Así, e cunha gran actuación nos bloqueos canarios, chegou o 2-0 ao marcador.
O partido poñíase costa arriba para as visitantes, que fixeron honra ao seu alcume e loitaron por vencer a un rival directo pola permanencia.
No terceiro set, lonxe de deixar que as canarias afianzasen o trunfo, o Emevé reaccionou con contundencia. O comezo desta manga mantiña a vantaxe local, pero a partir do 18-15 as galegas deron un golpe sobre a mesa.
Lucía Prol, Marta Otero e Inma Lavado foron clave no xogo visitante para lograr esta remontada momentánea. Despois de tres tempos, as loitadoras sumaban un punto ao seu casilleiro.
No que foi a última manga, un gran parcial 7-3 para o Sayre volvía situalas como favoritas para levarse o duelo. De novo, os erros no Emevé foron demasiado castigo, dándolle a vitoria final 3-1 ás locais.
Para gañar o duelo que lles de a permanencia, as loitadoras deben traballar e corrixir os erros no seu xogo, que foron a clave tras a última derrota. No partido ante o Sayre, as loitadoras foron máis efectivas en ataque, pero cederon máis puntos ao rival polos fallos cometidos, o que decantou a balanza polo bando canario.
O Emevé segue na loita pola permanencia
As loitadoras rozan xa a salvación da máxima categoría. A Liga Iberdrola achégase ao seu final e o Emevé acumula catro vitorias e catro derrotas dun punto que as deixan con moitas opcións de manterse.
As galegas están a tres puntos do oitavo e once do sétimo, o DSV CV Sant Cugat. Este será precisamente o seguinte rival das de Valle, que as recibirán en Lugo o mércores 10, ás 20:00 horas.
FICHA TÉCNICA
3) CV SAYRE: Wanda Banguero, Sara Esteban, Leticia Rodríguez, Angie Vente, Génesis Miranda, Marija Slavulj – sexteto inicial -. Tamén xogaron: Laura Juan (líbero), Selena Gómez e Liseth Caidedo.
1) CV ARENAL EMEVÉ: Audrey Alford, Inma Lavado, Sara Urrea, Carla Jiménez, Lucía Prol, Marta Otero – sexteto inicial -. Tamén xogaron: Cassandra Bujan (líbero), Ainara Burgo, Athanasia Liagki, Inés Rivas e Carolina Camino.
SETS: 27-25 / 25-17 / 22-25 / 25-15 (3-1).
ÁRBITROS: Correa e Bernaola.
INCIDENCIAS: Partido correspondente á 18ª xornada da Liga Iberdrola de voleibol no Centro Insular de Deportes.
