As xogadoras do CV Arenal Emevé tiveron que viaxar ata Sevilla para reencontrarse coa vitoria e sumar dous puntos vitais para lograr o obxectivo da permanencia. Unha gran remontada do equipo dirixido por José Valle fixo que o Cajasol Voley Dos Hermanas caera derrotado cun 2-3 en casa, na 15ª xornada da Liga Ibedrola de Voleibol da RFEVB.
O retraso na volta á competición das andaluzas pasoulles factura. Ao non poder disputar o partido ante o Algar Surmenor, as locais levaban sen xogar a competición regular desde antes do parón de Nadal, e a falta de rodaxe castigounas coa derrota.
‘Plot twist’ na tempada de cinema do Emevé
Esta ‘tempada de cinema‘ non está deixando moitos galardóns ás lucenses, pero cando o fai, non é sen méritos. Desta vez, foi necesario un xiro de guión materializado nunha remontada que permitiu ás galegas reencontrarse coa vitoria.
O 14 novembro foi a data da última vez que o Emevé sumou unha vitoria. Entón tamén foi a morte súbita a que determinou o encontro favorable para as lucenses contra o Cartagena Algar Surmenor (2-3).
Nesta ocasión, os primeiros compases do partido situaban a balanza a favor das andaluzas. A intensidade ofensiva do xogo local permitiulles levarse o primeiro set.
Na metade desta manga o Cajasol xa vencía de cinco puntos, pero as loitadoras presionaban e empataron o encontro deixando o marcador nun 15-15. As andaluzas non baixaban os brazos e foron quen de defender a vantaxe inicial, rematando o primeiro tempo nun 25-20.
No seguinte set a dinámica foi similar, pero o Emevé logrou situarse desta vez por diante. As visitantes aguantaban a presión, mentres as andaluzas achegábanse perigosamente no marcador. No ecuador da manga as galegas vencían por tres puntos, e Magú pedía un tempo morto no banco local.
As directrices do adestrador xurdiron efecto nas xogadoras do Cajasol, e cun parcial 3-0 igualaban ás lucenses. Ambos equipos loitaban por levase o segundo tempo, chegando ao empate no 17-17. O pulso seguía a medida que avanzaban os minutos e case ao final, as andaluzas poñían o punto de set cun 24-23.
O Emevé salvou entón a bola aproveitando os erros en defensa das locais, pero estas sacaron proveito tamén dun fallo rival. Así, colocáronse por diante e pecharon o set cun 26-24, deixando o global en 2-0.
Inicio da remontada
O duelo poñíase costa arriba para as galegas, que non deixaron de loitar cada balón coa esperanza de sumar puntos para o seu casilleiro. O Cajasol confiouse co 2-0 e baixou a intensidade, feito que aproveitaron as loitadoras para presionar.
O Emevé ampliaba a vantaxe no electrónico sen que as andaluzas puideran facer nada para impedilo. Cun gran terceiro set (17-25), o partido aínda non estaba decidido.
A cuarta manga repetiu os acertos galegos e erros andaluces. O Cajasol acusou a falta de ritmo, perdido no anterior set, e o Emevé non perdoaba. Os tempos mortos solicitados polo adestrador rival non xurdiron efecto e a mediados do set as galegas levaban unha vantaxe de seis puntos.
As locais case logran o empate, achegándose perigosamente no marcador, logrando un 22-23 despois dun excelente parcial. Pero as loitadoras aínda tiñan moito que dicir e non se viron abaixo. Aproveitándose do contrincante, as de Valle atribuíronse o cuarto set, deixando o global en 2-2.
A base de esforzo e acerto, as lucenses levaron o encontro ata o tie break. Seguindo a incercia positiva, o Emevé deixaba sen opcións ao conxunto local. Desde o inicio deste quinto set, as galegas tomaron a iniciativa. Así, as visitantes non soltaron a vantaxe e lograron unha fazaña que lles mereceu os dous puntos da vitoria.
Lucía Prol, MVP da xornada
O bo xogo do Emevé tivo nomes propios. Lucía Prol, Sara Urrea e Inma Lavado foron as xogadoras máis destacadas do cadro lucense, pero tamén estiveron no Siete ideal Iberdrola.
Prol colocouse como a mellor xogadora da xornada, cunha gran actuación na que asinou 30 puntos, entre eles o da vitoria. A galega liderou ao seu equipo na remontada, e proclamouse máxima anotadora, sacadora e atacante, ademais de ser a terceira mellor receptora.
As súas compañeiras Urrea e Lavado tamén foron claves no xogo do Emevé. A primeira foi a segunda mellor sacadora da xornada, por detrás de Prol e terceira máxima anotadora. Pola súa banda, Lavado foi a segunda mellor bloqueadora.
Uns éxitos que teñen aínda máis valor tendo en conta o desenrolo do partido e o nivel das rivais. Winderlys Medina e Eliana González tamén se colaron entre as mellores xogadoras elixidas pola Federación Española.
FICHA TÉCNICA
CAJASOL VÓLEY DOS HERMANAS: Jimena Fernández, Judith Porras, Gisel Medina, Carla Moreira, Victoria Serrano e Andrea Silva. Tamén xogaron: Aylen González (líbero), María Rodríguez, Alba Ortiz e Victoria Van Eck.
CV ARENAL EMEVÉ: Carolina Camino, Marie Alford, Inma Lavado, Sara Urrea, Carla Jiménez e Lucía Prol. Tamén xogaron: Athanasia Liagki, Leann Bujan (líbero), Ainara Burgo e Marta Otero.
SETS: 25-20 / 26-24 / 17-25 / 23-25 / 12-15 (2-3).
ÁRBITROS: Carlos Portugal e Antonio Correa.
INCIDENCIAS: Partido correspondente á 15ª xornada da Liga Iberdrola de voleibol no Pavillón Los Montecillos Dos Hermanas (Sevilla).
