A sorte deixou de sorrir ao CV Arenal Emevé. Despois de lograr dúas vitorias nas anteriores xornadas, o equipo lucense perdeu a boa racha contra o Feel Volley Alcobendas.
O Alcobendas chegaba a esta cita en quinta posición, a sete puntos do líder e con catro partidos gañados de seis no seu haber. Tras lograr un pleno de sets no anterior encontro, contra o CV Kiele, as madrileñas desprazaronse a Lugo a por outra vitoria. Pola súa banda, as loitadoras comezaban a despegar da parte baixa da táboa e querían seguir sumando puntos para alonxarse do descenso na Liga Iberdrola.
Os erros do Emevé sentenciaron o partido
O partido foi un vaivén constante. Se un conxunto gañaba o set, o seguinte ía para o outro. Tanto foi así, que foron necesarios cinco tempos para deicidir o partido.
O primeiro set caeu da man das visitantes, cun 19-25 no electrónico. Pero as de José Valle recompuxéronse, e remontaron no segundo tempo, adiantándose no marcador cun 25-21. O partido seguiu moi axustado no terceiro set, que foi por unha diferenza de cinco puntos para o equipo visitante.
As lucenses seguiron loitando a pola vitoria e adxudicáronse o cuarto tempo, cun 25-18. Durante o partido, as xogadoras do Arenal Emevé foron superiores nos punto directos ao seu rival, logrando marcar seis puntos desta forma. Tamén o foron pola mínima en ataque, con 66 puntos fronte aos 63 do Alcobendas.
Con todo, o partido decidiuse polos erros do adversario. As loitadoras fallaron máis que as visitantes, que sumaron ata 35 puntos polos erros do Emevé. Finalmente, cun último set a favor das madrileñas, estas leváronse os dous puntos tras gañar 2-3.
FICHA TÉCNICA
CV ARENAL EMEVÉ: Carolina Camino, Audrey Alford, Inmaculada Lavado, María Rodríguez, Sara Urrea, Carla Jiménez, Lucía Prol, Ainara Burgo, Marta Otero, Lidia Figueira e Cassandra Leann Bujan.
FEEL VOLLEY ALCOBENDAS: Adriana Alonso, Cara Alleen Cunningham, Sofía Elizaga, Margalida Piza, Elizabeth Clark, Candela Alonso, Alejandra Álvarez e Lindsay Malloy.
SETS: 19-25 / 25-21 / 20-25 / 25-18 / 12-15 (2-3).
ÁRBITROS: Jesús Antonio Soria e Alberto Robles.
INCIDENCIAS: Partido correspondente á novena xornada da Liga Iberdrola de voleibol no Pavillón Municipal de Deportes de Lugo ante 50 espectadores.
