A falta dun par de xornadas e os partidos adiados, o CV Arenal Emevé roza a salvación. No seu camiño cara a permanencia, vencer no último duelo en casa ao rival directo e colista, o FC Cartagenta Algar Surmenor, é clave. O partido será o sábado, 20 de febreiro, ás 17:30 horas en terras lucenses.
“Vai ser un partido complicado. Ninguén quere abandoar esta Liga Iberdrola e van ser moi importantes os puntos que poidamos conseguir na fin de semana”, advirte José Valle, técnico das lucenses.
Malia estar separadas por seis puntos na táboa, este partido será vital para o futuro de ambos equipos. Porén, o Emevé parte coas de gañar.
No seu anterior encontro nesta tempada, as lucenses lograron vencer na morte súbita cun 2-3. Ademais, as de Lugo son o conxunto que está nunha mellor posición, a décima, con cinco vitorias e quince derrotas, pero sumando en catro delas.
Pola contra, o FC Cartagena Algar Surmenor só foi quen de vencer en dúas ocasións, se ben o fixo de tres puntos en ambas, e tamén sumou en catro derrotas dun punto.
Por outra parte, ambos equipos chegan dunha vitoria. As loitadoras do CV Arenal Emevé sumaron ante o Avarca de Menorca, un dos mellores equipos da categoría, nos minutos finais.
As que serán visitantes nesta xornada tamén gañaron, cun contundente 3-0 ante o CV Kiele, a súa primeira vitoria nas últimas cinco xornadas e segunda da tempada. Pero isto non debe levar a engano ás loitadoras, que tal e como recorda o seu adestrador deberán esforzarse para levarse o encontro.
As claves para gañar ao Algar Surmenor
Segundo apunta José Valle, o rival para este sábado é un equipo “de xogadoras veteranas e experimentadas. No seu bloque destacan dúas das súas centrais: Fernanda e Encarnación, que levan moitos anos militando na Superliga 1 con moitos títulos ás súsa costas”. Un perigo que no CV Arenal Emevé deben vixiar de preto.
Para o técnico galego, a vitoria pasa por ser fortes en defensa, impedir que as centrais xoguen moito e, en relación a isto, saber sacar ben. Tamén é fundamental non cometer moitos erros. “Se conseguimos e¡iso teremos opción de gañar, puntuar e seguir adiante nesta Liga que non se decidirá ata a última xornada, que vai ser o 6 de marzo”, declara o adestrador.
Lucía Prol representa ao Emevé no sete ideal da 20ª xornada
A 15 do CV Arenal Emevé segue brillando entre as mellores xogadoras, non só do seu club, senón tamén da Liga Iberdrola. Por este motivo, a Real Federación de Voleibol incluiuna como a segunda mellor atacante e anotadora, formando así parte do sete ideal.
No partido ante o Avarca Menorca, Prol foi vital na vitoria lucense, que tivo que se fraguar no tie break polo igualado das forzas entre os dous equipos.
O Emevé achégase á permanencia vencendo ao Avarca de Menorca (2-3)
