O CV Arenal Emevé comezou o ano cunha viaxe ás Illas Canarias para xogar dous partidos case seguidos contra Sanaya Libbys La Laguna e o IBSA CV CCO 7 Palmas. Dous rivais duros, da zona alta da clasificación, e aos que as loitadoras lograron rascar un punto.
Despois desta dobre xornada, as xogadoras de José Valle seguen na parte baixa da táboa da Liga Ibedrola de Voleibol da RFEVB, pero cun punto máis, que pode ser moi determinante na loita pola permanencia. Con oito puntos, as galegas están a dous do penúltimo e último clasificado e con cinco menos que o noveno.
Man a man contra o La Laguna
O primeiro reto foi contra o Sanaya Libbys La Laguna, o pasado xoves, nun partido no que as loitadoras do Emevé foron quen de tratar de ti a ti ao terceiro clasificado da Liga.
As lucenses tomaron o control da pista nos primeiros minutos de partido, adiantándose no marcador e asegurando o primeiro set. Para o segundo tempo, as canarias demostraron do que eran capaces e déronlle a volta por completo ao electrónico, adxudicándose a segunda manga.
A igualdade reinaba na pista, na que as loitadoras facían honra ao seu nome e pelexaban cada punto, cedendo poucos ao adversario. Pero o alto nivel do plantel de La Laguna era evidente e as canarias crecéronse na súa casa, aproveitando os erros nas recepcións galegas e levándose o terceiro set.
Para o cuarto tempo, Lucía Prol e Inma Lavado lideraron ao seu equipo cara o empate, logrando vantaxes moi valiosas que lles farían levar o partido á morte súbita.
Neste quinto set foi cando o partido se lle foi das mans ás xogadoras de Valle. As canarias duplicaron o acerto lucense, e finalmente leváronse a vitoria, nun partido no que o Emevé pode estar orgulloso da boa actuación realizada na pista.
Un Emevé sen opcións ante o IBSA 7 Palmas
Ao día seguinte, sen descanso, as loitadoras xogaban contra o IBSA 7 Palmas, o segundo mellor equipo da categoría, que só fallou en tres dos catorce partidos que leva xogados. Un escenario non moi favorable para as galegas, que chegaban con forza e ánimo tras o bo partido realizado ante o La Laguna.
Pero o cansancio acumulado e a superioridade do rival deixaron case sen opcións ao Emevé, que fixo o que puido para plantarlle cara a un dos mellores conxuntos do país.
De novo Lucía Prol e Inma Lavado levaron o peso do equipo no que á anotación se refire. Con 18 puntos entre as dúas, esta dupla de xogadoras marcou a metade da puntuación final do equipo galego. Pero desta vez, o seu acerto non foi suficiente para poñer ao rival en apuros.
O duelo comezou cun parcial 0-3 a favor das lucenses, pero a alegría durou pouco, xa que enseguida o IBSA 7 Palmas colleu o mando do partido e fixo o que quixo coas rivais. Cun marcador 25-10 as locais leváronse o primeiro set.
Para o segundo tempo, a tónica do partido seguía igual, cun cadro canario demostrando a súa superioridade e maior calidade no xogo. Con algo máis de acerto, as loitadoras non foron quen de frear ao contrario, que se anotou tamén a segunda manga.
No terceiro e último set, o resultado xa estaba escrito. De novo, as canarias impoñíanse sen complicacións, lideradas por Saray Manzano nas anotacións, quen remataría sendo a maior anotadora do partido.
Como nota positiva, estivo o debut da grega Athanasia Liagki, recentemente incorporada ao plantel do Emevé, que puido desfrutar dos seus primeiros minutos coa camisola vermella en terras canarias. A oposta aportou ademais tres puntos ao seu equipo, destacando nun rol no que as galegas foron superiores.
