O partido da pasada fin de semana que enfrontaba ao CV Arenal Emevé e ao OSACC Haro Rioja Voley non reflectiu o que se pode consultar na táboa clasificatoria. Ambos conxuntos chegaban cunha distancia moi notable de puntos, sendo as rioxanas claramente superiores, con 17 puntos máis que as lucenses. Porén, o encontro foi un espectáculo do voleibol, cun partido moi igualado, e que se decidiu no tie break cun 2-3 final para o Haro Rioja.
As loitadoras chegaban á décimo terceira xornada da Liga Iberdrola de voleibol dunha semana sen xogar polo adiamento do partido ante Sanaya Libbys La Laguna e con ganas de estrear a segunda volta con vitoria.
Pola súa parte, o Haro Rioja viña dunha racha de catro vitorias consecutivas que logrou aumentar a cinco, asentándose así na parte alta da clasifciación e a tres puntos do podio.
O Emevé logrou tratar de ti a ti a un duro rival
O primeiro set xa foi mostra da igualdade na pista entre ambos equipos. Nos primeiros minutos, o Haro dominaba o encontro, pero un axuste por parte do adestrador lucense, José Valle, logrou asinar a primeira manga para as locais.
No segundo tempo, o conxunto visitante reaccionou dándolle a volta ao marcador e empatando no cómputo xeral, logrando un 23-25 a favor. Para o terceiro set, as loitadoras seguiron presionando para levarse o partido e logrou impoñerse por unha axustadísima vantaxe de dous puntos.
O encontro non se decidía para ningún lado, e o cuarto set foi mostra disto. As rioxanas volveron a empatar no marcador, facendo necesario un tie break para decidir o resultado final.
Os nervios e a tensión fixeron que finalmente as locais non aguantasen o ritmo do partido e a maior experiencia do Haro Rioja xogou no seu favor. No último tempo, as visitantes lograron vencer por tres puntos, levandose así o último partido do 2020.
As lucenses vánse ás vacacións de Nadal con boas sensacións, pero sen resultados necesarios para escapar da parte baixa da clasificación. As loitadoras do Emevé voltarán á pista dentro dun mes, o 24 de xaneiro, cando visiten ao Cajasol Vóley Dos Hermanas.
FICHA TÉCNICA
CV ARENAL EMEVÉ: Carolina Camino, Marie Alford, Inma Lavado, Sara Urrea, Carla Jiménez, Lucía Prol. Tamén xogaron: Inés Rivas, Ainara Burgo, Lidia Figueira, Leann Bujan (líbero) e Marta Otero.
OSACC HARIO RIOJA VOLEY: Jocelyn Urias, Marta Santos, Ana Pérez, Tatiana Vera, Rocío Gómez e Sofía Bulgarella. Tamén xogaron: Vega Lopez (líbero) e Aida Etxebarría.
SETS: 25-23 / 23-25 / 28-26 / 23-25 / 12-15 (2-3)
ÁRBITROS: Hugo Suárez e Rafael González
INCIDENCIAS: Partido correspondente á décimo terceira xornada da Liga Iberdrola de voleibol no Pavillón Municipal de Deportes de Lugo ante 250 espectadores.
