O CV Arenal Emevé aposta polo talento galego na formación do seu plantel para a tempada 2021/2022 en Liga Iberdrola. A último incorporación é Jimena Fernández, xogadora coruñesa que chega ao club lucense para reforzar a posición de oposta.
A galega é unha das xogadoras con máis progresión da pasada campaña. Tal e como declarou o seu futuro adestrador, José Valle, Fernández “é unha xogadora que viviu unha gran progresión na última tempada e que, grazas á súa versatilidade, aínda pode seguir medrando ata acadar un nivel moi alto”.
O club das loitadoras contará coa coruñesa, que pode xogar como receptora ou oposta, aínda que se desenvolve mellor nesta última posición, desde a seguinte tempada. O técnico do Emevé indica que desde o equipo “esperamos que poida seguir medrando como xogadora e cremos que ten marxe de mellora en todos os aspectos. Confiamos en que vaiamos da man na súa mellora individual e a nosa como equipo”.
A traxectoria da nova cara do Emevé
Fernández chega a Lugo procedente do Cajasol Dos Hermanas, conxunto ao que chegou en idade xuvenil e onde compartía vestiario coa tamén nova loitadora Eliana González.
Co club andaluz, Fernández situouse como unha das mellores opostas estatísticamente na máxima categoría do voleibol español, entrando en dúas xornadas no septeto ideal. Antes de chegar ao Cajasol, a oposta formouse nas categorías inferiores no Liceo de A Coruña e logo formou parte da concentración permanente de Soria.
José Valle: “Apostamos por unha oposta nacional que o fixo francamente ben no seu anterior equipo”
En palabras de José Vale, a última fichaxe do Emevé, “é moi importante para nós. Apostamos por unha oposta nacional que o fixo francamente ben no seu anterior equipo”.
Con esta nova, as loitadoras xa contan con dúas novas incorporacións (con Castiglione), dúas renovacións (Camino e o propio Valle) e unha reincorporación (Eliana González).
