A Liga Ibedrola de Voleibol está a piques de rematar e o CV Arenal Emevé roza o seu obxectivo de lograr a permanencia na máxima categoría. Con 14 puntos na 19ª xornada, un trunfo salvaría virtualmente ás loitadoras. E estes puntos poderán chegar este mércores, 10 de febreiro, se as galegas gañan ás 20:00 horas ao DSV CV Sant Cugat.
O camiño na volta das loitadoras á categoría de ouro do voleibol español estivo cheo de pedras. Un comezo de tempada complicado, no que non chegaban os resultados, ancoraba ao Emevé aos postos baixos da táboa.
A falta dunha pretempada en condicións pasoulle factura ás lucenses no aspecto físico e, por iso, tamén no deportivo. Pasadas as semanas o grupo ás ordes de José Valle comezaba a coller forma e ritmo e antes de rematar o 2020 xa estaban fóra dos postos de descenso.
As loitadoras despedían o ano con 7 puntos, unha cifra que xa dobraron no que vai de 2021, e dependen só de si mesmas para poder salvar a categoría. Aínda quedan oportunidades para conseguilo: a Liga Iberdrola rematará dentro de catro xornadas.
Os erros propios, materia pendente do Emevé
Pero non hai salvación sen vitoria. O reto deste mércores é vencer ao Sant Cugat, un rival de media táboa que leva nove vitorias e unha derrota dun punto, o que as deixa a once puntos por riba das galegas.
O desta xornada non será un partido fácil. Na ida o trunfo foi para as catalás, superiores nas facetas ofensivas e defensivas e que gañaron o partido por un contundente 3-0. Entón, as loitadoras non tiveron opcións para a remontada e xogadoras como Iztiar López no bando rival sentenciaron o encontro.
Aquel partido disputouse a comezos de novembro e, desde entón, o Emevé non fixo máis que medrar na Liga Iberdrola. Na sexta xornada as lucenses eran colistas con 0 puntos; doce partidos despois, ocupan a décima posición con 14 puntos.
Porén, un fallo recurrente no plantel dirixido por José Valle son os erros propios que dan puntos ao rival. Esta foi causa de moitas derrotas no conxunto galego. Sen ir máis lonxe, no último duelo disputado, ante o Sayre, o Emevé sumou máis puntos en ataque que o seu contrincante, pero concedeulle máis polos erros propios cometidos ao longo do encontro.
Con todo, o máis importante da situación actual do equipo de Lugo é a seguinte: as loitadoras están xa a seis puntos do Madrid Chamberí e a sete do Cartagena Algar Surmenor, o colista da clasificación. A salvación está a un trunfo de distancia.