A cidade de Lugo será, por primeira vez na súa historia, a sede da Copa da Raíña de Voleibol, o torneo máis antigo deste deporte disputado en España. O Pavillón Municipal da cidade galega co Arenal Emevé verá pasar pola súa pista, os próximos 11, 12 e 13 de febreiro, aos seis mellores equipos ao final da primeira volta da liga Iberdrola.
As Loitadoras que dirixen José Valle e Manuel Blanco serán as anfitrioas dunha cita na que se buscará sucesoras no palmarés para as mozas do Feel Voley Alcobendas.
Os planteis de maior entidade e as mellores xogadoras do voleibol español participarán nunha competición que “supoñerá unha excelente oportunidade para demostrar o potencial de Lugo á hora de organizar eventos desta magnitude”, sinala a presidenta do Arenal Emevé, Bibí Bouza, ao referirse á que ela denomina como “a festa do volei”.
Seis duelos pola Copa
A afección lucense poderá gozar de seis vibrantes choques dentro dun cadro de eliminatorias no que os dous mellores equipos da primeira fase da liga Iberdrola serán cabeza de serie e, por tanto, evitarán a primeira rolda. Ao non ter opcións matemáticas de ocupar unha desas dúas prazas, as xogadoras do Emevé xa entrarán en competición o primeiro día, o 11 de febreiro, con horario aínda por determinar.
A celebración desta fase final supón o regreso da competición á provincia de Lugo tras máis dunha década. En 2010 e 2004 o pavillón da Pinguela de Monforte foi o escenario de dúas emocionantes edicións que acabaron coroando a Tenerife Marichal e C.A.V. Murcia 2005 respectivamente. De novo
as espadas volverán estar en todo o alto cunha cita que, seguro, estará á altura das expectativas.
