Tres partidos e tres oportunidades para asinar a permanencia. Este é o panorama ao que se enfronta o CV Arenal Emevé, que ten a súa primeira final ante o Avarca de Menorca, este sábado, 13 de febreiro, ás 18:00 horas.
As loitadoras están a unha vitoria de lograr a permanencia na Liga Ibedrola de Voleibol, pero esta está a darlles esquinazo nas últimas xornadas. O equipo de Lugo acumula dúas derrotas consecutivas, o que dificulta a consecución do seu obxectivo.
“Temos na nosa man vencer ao Menorca esta fin de semana”, declara o seu adestrador, José Valle. O técnico lucense tamén apunta que é moi importante que nos próximos partidos o Emevé sume “todos os puntos posibles” para evitar depender doutros conxuntos na loita por salvar a categoría. “Nese caso non teríamos nada que facer”, afirma contundente.
O Emevé venceu na ida, pero non debe confiarse na volta
Porén, as loitadoras non temen ao segundo clasificado. O Avarca de Menorca só acumula catro derrotas esta tempada, tres delas de cero puntos, entre as que se inclúe o duelo ante o Emevé da primeira volta.
No partido disputado no Pazo dos Deportes de Lugo, as loitadoras foron quen de superar ás baleares en todos os sets, cun debastador 3-0 ao seu favor. Neste duelo, o primeiro trunfo galego, destacaron xogadoras consolidadas nas filas lucenses como Lucía Prol, Carla Jiménez e Carolina Camino, as máximas anotadoras do encontro.
José Valle: “Sempre é máis complexo xogar a domicilio”
Porén, nesta ocasión as visitantes serán as galegas, o que cambia o escenario. “Sempre é máis complexo xogar a domicilio”, advirte Valle.
Ademais, o Menorca chega con gañas de venganza. Aparte de ter perdido o primeiro encontro coas lucenses, as baleares sufriron unha derrota 3-0 na última xornada ante un rival directo, o CV Kiele. Con todo, manteñen a posición de prata con 41 puntos.
Para este partido, Valle contará con 10 das súas xogadoras. “Esperemos que sexamos capaces de plantarlle cara a ese difícil rival e que poidamos sacarlle puntos alí”, declara o adestrador antes da cita.
Lidia Figueira, no 7 Ideal
Unha parte importante no xogo galego será a líbero Lidia Figueira. A lucense ven de ser recoñecida como a mellor na súa posición na xornada xogada entre semana, entrando a formar parte do 7 ideal da RFEVB.
A xove xogadora de 16 anos demostrou o seu gran talento na pista ante o Sant Cugat e malia a derrota asinou un gran partido.
Quen tamén entrou neste equipo titular escollido pola Federación foi María A. Gomila, tamén líbero, e rival das loitadoras para esta fin de semana no bando do Avarca de Menorca.
Ver esta publicación en Instagram
