O CV Arenal Emevé iniciou un novo curso en Liga Iberdrola con derrota. As lucenses viaxaron para enfrontarse ao Avarca de Menorca, co que disputaron un equilibrado partido que se tivo que decidir nun set extra finalizando no 3-2.
Ao longo do encontro as galegas foron superiores nos puntos directos, sumando desta forma seis puntos fronte a un solitario tanto local. Porén, o Menorca foi mellor nos ataques, así como nos bloqueos, controlando ao Emevé nestes aspectos.
Duelo igualado
O partido comezou igualado entre ambos bandos, con dous equipos fortes nos ataques, que se alternaban na puntuación mantendo táboas ata o 15-15. Entón, as lucenses apretaron para facerse coa primeira manga cun 19-25.
Pero a resposta local foi maior no segundo set, no que o Avarca Menorca aumentou o nivel desde os primeiros minutos, para dominar en cada parcial e vencer por un 25-15. As galegas do Emevé non se quedaron atrás, e recolocáronse para darlle a volta ao marcador, vencendo neste terceiro set por un 15-25.
Cun partido igualadísimo, as xogadoras de ambos equipos loitaban por cada balón, cunha lixeira vantaxe para as menorquinas, que lideraban por escasos puntos cada parcial. Cun axustadísimo 25-23, o duelo tivo que chegar ao tie-break.
Nesta manga definitiva o poder sobre o terreo de xogo alternouse, co Emevé liderando o partido por momentos, ata que nos últimos minutos as locais subiron o nivel, aceleraron, e venceron por só dous puntos. Cun 3-2, as lucenses comezan cun partido perdido a nova campaña.
A xogadora máis anotadora do partido foi a galega Jimena Fernández Gayoso, quen anotou 25 puntos ao longo do encontro, catro deles sendo puntos directos.
Tras este partido, o Emevé ocupa a sétima posición, cun punto, liderando a metade baixa da táboa.
O Emevé no top da xornada
Nos tops elaborados pola Real Federación Española de Voleibol, dúas xogadoras do Emevé entraron no listado das mellores da xornada. Jimena Fernández foi a mellor sacadora, así como a segunda mellor atacante, mentres que Darvelis Mosquera resultou a quinta mellor bloqueadora da competición.
FICHA TÉCNICA
AVARCA DE MENORCA: Barrasa, Llorens, Sansó, Folgueira, Wstergaard, Pejkovic. Tamén xogaron: Gomila (líbero), Jofre, Banguero, García e Figueroa.
CV ARENAL EMEVÉ: Capovilla, Mosquera, Castiglione, Camino, Lavado, Gayoso. Tamén xogaron: Figueira (líbero), Otero, Burgo e Obi.
MARCADOR: 19-25, 25-15, 15-25, 25-23 e 16-14.
ARBITRAXE: Susana Trigo e Fernando Pérez.
INCIDENCIAS: Partido da primeira xornada da Liga Iberdrola disputado no Pavelló MunicipalD’Sports de Menorca.