Na última xornada disputada na Liga Iberdrola de Voleibol, o CV Arenal Emevé caeu derrotado na casa por un 2-3 ante o Avarca Menorca. As galegas repetiron o guion visto no partido de ida que as enfrontaba ás baleares, caendo no tie break. “Xogamos un partido moi irregular”, analizaría o seu adestrador, José Valle, tras o encontro.
Esta é a segunda derrota consecutiva das loitadoras de Lugo, que ocupan polo de agora ocupan a sexta posición, cun total de 17 puntos tras doce partidos disputados.
O mal inicio de partido marcou ás loitadoras
As xogadoras do club lucense víronse sorprendidas no primeiro set por un Avarca Menorca liderado pola a súa capitá, Maira Westergaard. Os erros na recepción das locais custáronlle as primeiras desvantaxes (5-8) que obrigaron a José Valle a parar o encontro. Non conseguiron dar coa tecla en ningún momento as lucenses que viron como os seus rivais xestionaron a distancia en todo momento ata apuntarse o primeiro set.
A historia do segundo foi ben diferente: coas locais moito máis enchufadas, o marcador reflectiu pronto vantaxes ao seu favor. Marta Otero, Carolina Camiño e Jimena Fernández atoparon as diagonais con facilidade e o electrónico regresou ás táboas despois dunha manga moito máis acertada por parte do Emevé en todas as facetas do xogo.
O vento seguiu soprando a favor das lucenses nos primeiros puntos do terceiro set, cando Inma Lavado selou catro puntos consecutivos ao saque. Pepe Llorens, moi intelixente, parou o refacho cun tempo morto e a partir dese momento as súas comezaron a crecer ata darlle a volta ao electrónico (7-8). A dinámica fíxose preocupante cando tras tres puntos consecutivos das baleares (7-11) José Valle viuse obrigado a parar o duelo.
O técnico de Abadín introduxo tamén unha variante táctica coa entrada de Sara Urrea e a partir dese momento comezou un intenso intercambio de golpes entre ambos os equipos. O pulso durou ata o tramo decisivo, cando un Menorca máis acertado fíxose co set con dous puntos consecutivos (23-25).
As visitantes aseguraban un punto e un xerro de auga fría caía sobre o Municipal que esperaba a remontada do Emevé. Non cabían máis erros para as loitadoras se querían puntuar e iso quedou claro nos primeiros compases do cuarto set. Sempre por diante, as lucenses parecían camiñar cara ao tie break con firmeza, pero os descoidos comezaron a aparecer para devolverlle a vantaxe a Menorca (13-15).
Con outra pausa de José Valle as súas volveron tomarlle o pulso ao choque (16-15). De novo ambos os equipos enfrontáronse a un escenario como o do anterior set coas forzas moi parellas, pero foi nesta ocasión o Arenal Emevé o que soubo apertar o acelerador para levar a resolución
do partido ao Tie Break (25-20).
De novo, como no partido da primeira volta e como a semana pasada en Dos Hermanas, a sorte foi esquiva ás lucenses na morte súbita e viron como se escapaba unha nova oportunidade sumar unha vitoria.
A falta de experiencia pásalle factura ao Emevé
No postpartido, o adestrador José Valle declarou en rolda de prensa que os altibaixos que deixa ver o equipo na competición non teñen polo de agora explicación: “En calquera tempada anterior estariamos falando da xuventude do grupo, pero non atopo explicación. O certo é que o grupo segue a ser moi xove, as xogadoras que determinan e se xogan os puntos non sobrepasan os 20 anos ningunha e entendo que será iso, pero honestamente xa non o sei”.
O preparador sinala que “temos o nivel físico, pero falta o factor psicolóxico e a experiencia e é aí onde estamos sendo irregulares”
No relativo ao encontro ante o Avarca Menorca, Valle asegurou que as súas xogadoras iniciaron o partido mal, mentres que o rival “é un equipo que vén de xogar o play off e Copa os últimos 10 ou 12 anos seguidos. Obviamente vai buscar ese obxectivo. Nós somos un equipo que debería ir medrando pero estes partidos demostran que temos moitísimo por mellorar e traballar”.
Valle: “Temos moitísimo por mellorar e traballar”
O Emevé terá descanso ata o día 27, unha pausa “máis que merecida”. Á volta, o equipo traballará o apartado técnico “porque necesita unha evolución neste sentido”. Ademais, as loitadoras prepararán xa o partido ante o Haro, programado para o 8 de xaneiro.
Así mesmo, o Emevé agarda a chegada de Massiel da que Valle espera que aporte “ese puntito de experienica que nos falta”.
