Con nove xornadas aínda en xogo, o CV Arenal Emevé aínda ten moito que dicir na Liga Ibedrola de Voleibol da RFEVB. As lucenses teñen este domingo unha nova oportunidade de sumar puntos que as alonxen da cola da táboa. Xogarán o 24 de xaneiro, ás 12:00, contra o Cajasol Voley Dos Hermanas, na pista das andaluzas.
Despois da dobre cita das Canarias, este será o terceiro encontro que as loitadoras disputen lonxe de Lugo. O Emevé non poderá contar co apoio do seu público, que deberá seguir o partido a distancia.
Este encontro, ante un rival de menor nivel que o Sanaya Libbys La Laguna, ao que as lucenses lograron rascar un punto, pode supor un paso importante para conseguir o obxectivo da permanencia.
Con oito puntos despois de dúas vitorias (unha de tres puntos e unha de dous) e doce duelos perdidos (tres derrotas dun punto e nove de cero), as galegas dirixidas por José Valle son terceiras pola cola.
Un rival adquirible
Cun partido menos, ao adiarse o seu encontro contra o Algar Surmenor por casos positivos no cadro murciano, o Cajasol Dos Hermanas leva 14 puntos. As que serán xogadoras locais sitúase na oitava posición, dous por riba das lucenses.
As andaluzas levan sen xogar a competición regular desde o mes de decembro, polo que a falta de rodaxe nesta liga pode ser un punto a favor para as galegas.
Pero o nivel do rival será alto. As loitadoras non poden confiarse, ante un equipo que ven de gañar o pasado 9 de xaneiro a Copa de Andalucía vencendo cun 3-0 ao AVG 2008 Almería Volley, de Superliga 2.
Carla Jiménez, do Emevé, a mellor bloqueadora da xornada
Ademais de lograr un punto na súa viaxe ás Illas Canarias, as loitadoras do Emevé poden celebrar a designación da súa compañeira Carla Jiménez como mellor bloqueadora das Estrellas da Xornada.
A xove catalá foi recoñecida como unha das mellores da Liga Iberdrola na súa posición e é, en palabras do seu club, “unha peza clave da nosa MURALLA”.
Ver esta publicación en Instagram
