Lugo e o Arenal Emevé dan a benvida a Marta, Bozhena, Alika y Valeriia, catro refuxiadas ucraínas. O club lucense ofreceralles aloxamento, manutención e escolarización, e as rapazas adestrarán cos equipos infantil e júnior da entidade.
A presidenta do club, Bibí Bouza, declarou que “os valores que nos representan non nos permitían mirar de lado a unha situación tan dolorosa. Oxalá Marta, Bozhena, Alika e Valeriia poidan recuperar pronto as súas vidas, pero mentres non sexa posible, nós darémoslles todo o noso apoio“.
A tempada regular dos equipos de Liga Iberdrola e Superliga Masculina chegou ao seu final o pasado sábado, pero a actividade da entidade non termina cando se apagan as luces do Municipal.
O labor formativo segue o seu curso coa preparación dos equipos das categorías inferiores, que teñen os Campionatos de España no horizonte, pero o que realmente move á familia que conforma o Arenal Emevé é poñer en práctica os valores que lle representan.
Emevé solidario
Por iso, a través da intermediación da representante de xogadoras Ira Andrusenko e a ONG Cantabria por Ucraína, desde o club decidiuse activar a posibilidade de dar acollida a catro novos ucraínas que sufrían os efectos da devastadora invasión que padece o seu país desde hai case un mes.
As tres mozas chegaron a Lugo esta fin de semana despois de tres días de viaxe e permanecerán na cidade mentres se prolongue o conflito. Ademais, todas elas integraranse nas dinámicas de adestramento dos equipos das súas respectivas categorías (infantil e júnior) que comezan a preparar a súa participación nos Campionatos de España.
Segundo informa o club, esta iniciativa, que contará co apoio de Concello de Lugo, súmase a outros actos promovidos por parte do club en solidariedade co pobo ucraíno como foi a doazón a Cruz Vermella de Ucraína do despacho de billetes do partido ante DSV Sant Cugat, o pasado cinco de marzo.
A intención do Arenal Emevé é que proximamente poida chegar a Lugo tamén a nai e de dúas das novas, Marta (19) e Bozenha (12), que son irmás. A entidade, a través desta iniciativa, quere achegar todas as ferramentas que lle ofrece a súa actividade deportiva ordinaria para poder cambiar a historia de catro rapazas que viron truncados os seus soños pola invasión do seu país. Nin elas, nin ningunha dos millóns de persoas que están a sufrir este conflito deberían sufrir os efectos dunha loita armada que carece de sentido en pleno século XXI.
O club lucense súmase aos clubs deportivos que están acollendo deportistas ucraínas nas súas filas, como tamén fixo o Dépor ABANCA.