Para a vindeira tempada, a 2021/2022, o Durán Maquinaria Ensino podería ser equipo europeo. As galegas enviaron xa a súa solicitude á Federación Española de Baloncesto para formar parte da EuroCup no próximo curso.
Aínda non hai confirmación oficial, pero o presidente do club, Manuel Durán, móstrase optimista. En declaracións a As Nosas, o dirixente afirma que “temos todas as papeletas para poder ir á EuroCup”. O equipo está agora á espera de recibir a luz verde por parte da FEB.
Esta semana coñeceuse a nova de que o Valencia Basket, vixente campión da Copa europea, competirá na Euroliga. Desta forma, todo apunta a que tres equipos españois participarán na liga europea, e catro o farán na Copa.
Lugo está lista para a EuroCup
O Ensino cumpre xa coas condicións necesarias, desde o aforo do Pazo Provincial dos Deportes de Lugo, ata os requisitos económicos. O club púxose xa en contacto coa Xunta, a Diputación de Lugo e o Concello lucense e todas as partes están predispostas a colaborar. Ademais, o equipo tamén conta con patrocinadores privados.
En principio, só “unha avalancha de peticións doutros equipos de España e o resto de países” poría en risco as posibilidades de que as galegas disputen a EuroCup.
Mentres non chega a confirmación oficial, o Durán Maquinaria Ensino está á espera de lanzar a campaña de abonos, “que para nós é moi importante”.
A visita de grandes equipos europeos ao Pazo dos Deportes de Lugo sería un aliciente para a cidade. O presidente do Ensino sinala como “non é o mesmo ver a Liga española, que é probablemente a mellor de Europa, que poder ver a equipos doutras competicións. É un aliciente importante, a min gustaríame ver a equipos italianos, franceses… Hai moi bo nivel ademais”.
Europa, un alicente que pode convencer a futuras xogadoras a fichar
Tamén suporía un plus para o propio Durán Maquinaria Ensino, xa que posibilitaría fichaxes de maior nivel. “Se xogas Europa, as xogadoras darían un paso máis para vir a Lugo. Non é o mesmo un equipo que xoga Euroliga ou EuroCup, que un equipo no que só te ven en España. Ábrese o abano de poder mellorar, que te vexan outros clubs, de poder fichar… Hai moitas mozas que durante estes anos non deron o si porque non xogabamos a EuroCup”, apunta o mandatario do club lucense.
Manuel Durán: “Se xogas Europa, as xogadoras darían un paso máis para vir a Lugo”
“Todo vai depender de que a Federación diga que si nos próximos días e a partir de aí porémonos a traballar”, conclúe Manuel Durán.
