Chegaron o Maristas Coruña e o Celta Zorka Recalvi cos deberes feitos á última xornada da liga regular na LF2. E pese a diferencia de potencial, sobre o papel, as coruñesas intentaron dar a sorpresa, sabedoras de que en cada partido desde o salto inicial até o bucinazo final todo está por decidir. Pero o certo é que Celta e Maristas teñen realidades deportivas diferentes. Mentres as celestes loitan por dar un paso cara a seguinte categoría, as vermellas celebran ter acadado a permenancia na Liga Feminina 2 para asentar o seu proxecto aos poucos nesta categoría. Así, ao final, impúxose a lóxica e o equipo local gañou 88-41 as visitantes levándose o duelo Vigo – Coruña.
Aguantou o Maristas Coruña o primeiro cuarto (20-13), axudadas polos erros das celestes nos minutos finais deste tramo. Pero xa no segundo cuarto, un parcial de 18-6 para as xogadoras que adestra Cristina Cantero puña o partido 38-19 ao chegar a o descanso. O Celta Zorka Recalvi dominaba o rebote da man dunha inspirada Marita Davydova que capturou once antes do descanso.
O Maristas Coruña de Jorge Carreira acusou as baixas de xogadoras como Laura Hughes e Adriadna González e tamén as diferencias nas rotacións. No caso do Celta, o movemento de xogadoras no banco foi constante. As rotacións imprimiron ao seu xogo un reparto de esforzos que permitiu ao bloque que adestra Cristina Cantero non afloxar ni ter baixóns ao longo do partido. Xusto o que precisará de cara a fase de Leganés.
O terceiro cuarto, o mellor momento en ataque do Maristas Coruña
Volveron aguantar as herculinas no terceiro cuarto, no que botaron o resto en ataque aínda que tampouco conseguiron imporse as viguesas (25-16)
Arrincaron os últimos dez minutos cun resultado de 68-35 lucindo no marcador electrónico e, outra vez o Celta Zorka Recalvi pasoulle por riba ao Maristas Coruña cun contundente 25-6 que deixaba o partido 88-41. De feito, Jorge Carreira aproveitou para darlle minutos na LF2 a xogadoras da canteira como premio de fin de tempada. Tamén Cristina Cantero deu cancha a xogadoras da base.
O Celta Zorka Recalvi remata a competición regular en terceiro posto e xogará a fase de ascenso a Liga Endesa que se xogará en Leganés, pero ademais, as celestes teñen praza asegurada no novo formato de Liga Femenina 2-Pro que haberá na tempada 2021-22.
Deste xeito, o conxunto vigués do Celta Zorka Recalvi queda agora á espera do que depare o sorteo da fase de ascenso que se disputará en Leganés do 8 ao 11 de abril. A sorte coñecerase o vindeiro martes día 30 de marzo. Da fase de ascenso sairán dúas prazas para xogar o curso próximo (2021-22) na Liga Femenina Endesa, a elite do baloncesto femino estatal. Galicia xa contan esa categoría co concurso do Durán Maquinaria Ensino.
Xogarán esta fase de ascenso, ademais das viguesas do Celta, as ferrolás do BAXI, que adestra Lino López e que chega invicto a esta fase da competición tras gañar 26 de 26 partidos. A lista de equipos que loitarán por ascender se completa con: Osés Construcciones Ardoi e Extremadura Miralvalle Plasencia (polo Grupo A), Laboratorios Ynsadiet Leganés, Pacisa Alcobendas, UCAM Primafrío Jairis e Sinergia Real Canoe (polo Grupo B) e Barça CBS, Lima-Horta Barcelona, Snatt’s F. Sant Adrià e Advisoria Maresme (polo Grupo C).
FICHA TÉCNICA
88) CELTA ZORKA RECALVI: Adrienne Motley (4), Lucía Fontela (0), Celia García (5), Maja Stamenkovic (15) e Marita Davydova (10) – quinteto inicial -. Tamén xogaron: Ainhoa Lacorzana (4), Noa Comesaña (10), Florencia Niski (3), Clara Prieto (3), Mariona Martín (6), Angela Coello (13) e Rose Marie Julien (15).
44) MARISTAS CORUÑA: Laura Martínez (7), Tatiana Casal (5), Eugenia Filgueira (4), Andrea Pérez (4) e Mara Cortés (3) – quinteto inicial -. Tamén xogaron: Joana Ferreira (6), Marina Feijoo (0), Lucía Galán (0), Laura Cervelo (11), Laura Ruiz (0) e Sara Bastos (1).
PARCIAIS: 20-13, 18-6, 25-16 e 25-6.
ÁRBITROS: Elio Clavería Sánchez e Julio César Alonso Díez. Sinalaron 20 faltas persoais a xogadoras do Celta Zorka Recalvi e 14 a deportistas do Maristas Coruña.
INCIDENCIAS: Partido correspondente á vixésimo sexta xornada da Liga Feminina 2 no seu Grupo A, disputado no complexo municipal deportivo de Navia ante 150 personas (aforo reducido debido á pandemia de COVID-19).
