O Paco Paz de Ourense acollerá o cruce entre o Envialia e o Poio Pescamar. O duelo de rivalidade entre futbolistas galegas será mañá sábado 5 de decembro a partir das 19:30 horas. O partido, correspondente á oitava xornada da Primeira División do Fútbol Sala Feminino da RFEF, será transmitido pola Televisión de Galicia a través da súa web.
Ourense Envialia e Poio Pescamar chegan a este cruce entre galegas en situacións diferentes. Por un lado, na clasificación están por diante as futbolistas que adrestra Manu Cossío, que ocupan a terceira praza fronte á sexta posición que ostentan as de Morenín. Pero mentres as de Ourense veñen de gañar e buscan acadar un novo triunfo para apuntar a unha traxectoria ascendente, as pontevedresas recibiron un duro golpe de moral no seu último cruce.
Logo da súa contundente derrota en Navalcarnero (6-1), e tras unha xornada de descanso, o Poio Pescamar está desexando colleitar un novo triunfo que lle permita non perder o fío da cabeza da táboa. Aínda que unha derrota ante o Futsi Atlético Navalcarnero entra sempre no posible (levan tres anos invictas en Liga), facelo por un marcador tan avultado non deixa de ser un pau á moral das galegas.
Pola contra, o Ourense Envialia vén de vencer na xornada sétima ao CD Leganés FS Masdeporte a domicilio por un tanteo de 4-6. Ese triunfo permitíu as de Morenín empatar coas madrileñas na táboa e afianarse na zona morna da clasificación. Unha nova vitoria sería crucial para as albinegras á hora de gozar de maior tranquilidade no que resta de competición liguera.
Haberá público no Paco Paz para a visita do Poio
Nesta ocasión, a situación sanitaria e polo tanto as restricións por mor da pandemia de COVID-19 permiten que o partido poida contar con público na bancada. Será un aforo limitado pero as persoas que desexen presenciar en vivo este duelo entre conxuntos galegos deberá acudir a mercar o seu billete a partir das 19:00 horas na porta 8 (entrada Boulevard) segundo informa o Ourense Envialia FSF.
