Coa décimo sexta xornada de LF2 chegaba o derbi pontevedrés entre Celta Zorka Recalvi e CB Arxil, dous equipos distanciados na táboa, pero igualados sobre a pista. Os dous puntos quedaron na casa das celestes, pero non sen esforzo, ao ver como as verdes loitaban cada balón e case dan a sorpresa (73-70).
O equipo dirixido por Cristina Cantero chegaba forte a este partido como local, tras gañar tres partidos seguidos. Pola súa banda, as de Maite Méndez chegaban nunha peor posición e tendo que disputar dous encontros na mesma fin de semana.
A superioridade na traxectoria da Liga Feminina 2 do Celta sobre o Arxil non se viu sobre a pista, onde as pontevedresas foron superiores no tiro de campo, sobre todo desde a liña de tres. Un acerto que case lles da a vitoria, que finalmente foi para as viguesas.
O Celta sufriu para gañar
Nos primeiros dez minutos, as xogadoras locais lograron impoñer o seu xogo, seguras en defensa e en ataque, e sen perder ningún balón. Desta forma, con 25 tiros a canastra fronte aos 12 contrarios, o acerto celeste traduciuse en 28 puntos, a maioría grazas a Maja Stamenkovic e a Clara Prieto, con dous triples cada unha.
Para o segundo cuarto, o plantel dirixido por Méndez reaccionou e atopoulle o punto ás viguesas. As verdes saíron fortes á pista, asinando un parcial 0-6 nos primeiros minutos e obrigando a Cantero a pedir un tempo morto. Canastra a canastra, o Arxil recortaba distancias e situábase a cinco puntos do Celta, que acusou de moitas perdas de balón pola boa presión das pontevedresas. O bo facer das visitantes non foi suficiente para superar ás locais, que gañaban de once ao descanso.
Tras o paso por vestiarios, a igualadade cada vez era maior sobre o parqué de Navia. Un parcial 1-15 das verdes, lideradas por María Lago, mantiña o encontro cun resultado aberto. Ambos equipos turnábanse ao sumar puntos, aínda que o Arxil facíase máis forte a medida que pasaban os minutos. No final do terceiro tempo, o dúo celeste Stamenkovic-Comesaña lograban empatar o marcador a falta de dez minutos para o final.
O partido decidiuse no último minuto
No último cuarto, a iniciativa foi da man das viguesas, que aumentaban a súa distancia no electrónico respecto ás verdes. Isto non freou ás pontevedresas, que lonxe de baixar os brazos, seguiron apretando e poñendo en apuros ás locais. A falta de pouco máis dun minuto para a bocina final, a igualdade volvía reinar sobre o resultado.
Así, o partido decidiuse no minuto final. Tres ataques do Arxil achegábanas á vitoria, pero sen resultado, ante o bo facer de Stamenkovic nas celestes. A 18 segundos da fin do duelo, as locais gañaban de dous. Pero o partido non rematou aí. Unha xogada de Celia García logrou frear o ataque de Natalia López, convertindo dous tiros libres para o Celta. Pola súa banda, María Lago seguía tirando das pontevedresas, anotando un valioso tanto, que as deixaba a un punto das locais.
Finalmente, un tiro libre de Celia García debido a unha falta antideportiva lograba deixar os dous puntos da vitoria en casa, converténdose no cuarto trunfo consecutivo das xogadoras de Cantero.
Así, o Celta segue na cuarta posición, con 28 puntos, mentres que o Arxil sitúase na undécima, con 19.
Desfruta aquí do resumo do derbi pontevedrés entre Celta e Arxil:
FICHA TÉCNICA
73) CELTA ZORKA RECALVI: Mariona Martín (2), Lucía Fontela (-), Celia García (15), Maja Stamenkovic (20), Marita Davydova (4) -cinco inicial-. Tamén xogaron: Noa Comesaña (8), Florencia Niski (3), Clara Prieto (6), Angela Coello (4) e Rose Marie Julien (11).
70) CB ARXIL: Carla Fernández (2), María Lago (22), Noelia Masiá (5), Heather Forster (14), Bineta Ndoye (4) -cinco inicial–. Tamén xogaron: Cristina Díaz-Pache (2), Margarita Moreira (2), Natalia López (11) e Sara Castro (8).
PARCIAIS: 28-13, 15-19, 12-23 e 18-15.
ÁRBITROS: Christian Abalo Buceta e Adrián Pérez Álvarez. Sinalaron 20 faltas a Celta Zorka Recalvi e 16 faltas a CB Arxil.
INCIDENCIAS: Partido correspondente á 16ª xornada da LF2 disputado no pavillón municipal de Navia a porta pechada.