Por segunda vez en menos de dúas semanas, Cidade de As Burgas e Ourense Envialia enfrontábanse no Paco Paz. O pasado 12 de decembro, o encontro ligueiro decantábase para as laranxas e desta vez, na Copa da Raíña, o fixo de novo.
As xogadoras dirixidas por Manolo Codeso non foron quen de aguantar o ritmo goleador do plantel de Morenín, que logrou impoñerse cun 2-9 final para as laranxas.
Marta Figueiredo, do Envialia, estreou marcador en pouco tempo, aos cinco minutos do inicio do encontro, marcando o que sería a tónica xeral do partido. Repetiría outros cinco minutos despois, comezando a marcar distancias co rival.
O ataque das xogadoras de Morenín era constante e o cadro do Cidade de As Burgas non atopaba contestación suficiente. As ocasións de Laura Uña e Iria Saeta eran continuas, xerando perigo constante na área defendida polo plantel de Codeso. Así chegaron dous goles máis para o Envialia, precedidos polo da xove futbolista Carmen.
A reacción do Cidade non foi suficiente para remontar ao Envialia
Ante a goleada, o adestrador verdibranco colocou a Ana Lastra baixo paos, pero os tantos laranxas seguían chegando. A falta de once minutos para o final, cando o electrónico xa sinalaba o 0-6, chegaba o primeiro do Cidade, da bota de Fara.
O tanto foi en seguida contestado por Uña e María, pero as de Codeso non baixaban os brazos e outra das xoves promesas, Sol desta vez, anotou un gol para as de verde e branco.
Nos últimos minutos o ritmo de xogo e a tensión aumentaban. O Envialia non deixaba de presionar e ata sobre o pitido final sumou un tanto máis, obra de Carmen, pasando así de fase na Copa.
O Envialia lévase o derbi ourensá vencendo ao Cidade de As Burgas por 1-3
FICHA TÉCNICA
CIDADE DE AS BURGAS: Iria, Clara, Sol, Sara, Lucía Nespereira -quinteto inicial-. Tamén xogaron: Sonia, Nahir, Canolich, Aroa, María Velle, Ana, Carlota e Lucía.
OURENSE ENVIALIA: Vanessa Barberá, Chiky, Laura Uña, Iria Saeta, Jenny Lores -quinteto inicial-. Tamén xogaron: Marta, María Arias, Judith, María, Carmen, Susana e Alejandra.
GOLES: 0-1, min. 5: Marta, 0-2, min. 10: Marta; 0-3, min. 13: Carmen; 0-4, min. 14: Laura Uña; 0-5, min. 28: Iria Saeta; 0-6, min. 29: María Arias; 1-6, min. 33: Fara; 1-7, min. 35: Laura Uña; 1-8, min. 36: María; 2-8, min. 39: Sol; 2-9, min. 40: Carmen.
ÁRBITROS: Carreira Romero e Ferreiro Carbajal.
INCIDENCIAS: Partido correspondente á Copa da Raíña disputado no Paco Paz.
