A xornada de derbi na LF Endesa deu a vitoria ás locais. O triunfo no duelo galego foi para o Durán Maquinaria Ensino, que venceu por 72-63 ao BAXI Ferrol.
Con este resultado, as ferrolás afrontan un tramo final complicado para salvar a categoría. Actualmente son colistas con 33 puntos, empatadas co Bembibre, a un punto do Tenerife e a dous do Leganés e o Gernika. Pola súa parte, as lucenses ocupan unha cómoda novena praza, con 38 puntos.
Nos veremos el año que viene, seguro 💪 en lo que queda @UniFerrol https://t.co/SjY67J0WnQ
— Ensino Lugo (@EnsinoLugoCB) April 3, 2022
Talento das nosas en ambos bandos
Malia o resultado final, o partido estivo igualado de principio a fin. Coa enerxía de 300 persoas de Ferrol na bancada lucense, o BAXI arrancou con forza no derbi cunha canastra de Carmen Grande.
Tras un parcial 0-5, as de Fernán Varela activáronse para responder, e cun xogo coral con Oma, Lizarazu e White como protagonistas, deu a volta ao marcador poñéndoo a favor do Ensino. As ferrolás non quedaban atrás e o primeiro cuarto rematou en táboas 12-12.
Con emoción no parqué e na bancada, o segundo parcial comezaba tamén con igualdade. Ivanovic adiantaba ás visitantes, pero as locais facían un excelente 8-0 que lles daría a vantaxe. Lino López parou o reloxo para darlle instruccións ás súas, que responderon cun 0-7 cunha acertada Koenen. Varela tamén pararía o tempo reactivando ás lucenses, que asinaron un 10-0, impoñendo a súa superioridade para o descanso, e un colchón importante para a segunda parte (34-25).
Tras a reanudación o BAXI lastraba os seus erros, dos que se aproveitaba o Ensino para manterse por diante. Con todo, lonxe de baixar os brazos, as universitarias reaccionaban minutos antes do remate do terceiro cuarto, e a base de triplos colocábanse a catro puntos das rivais.
No último tempo, a vitoria do derbi estaba por decidir e o partido seguía aberto. Non foi ata os minutos finais cando as de Lugo deron o último golpe na mesa e asinaron a vitoria, sacando proveito dun triplo de Aliaga para rematar o duelo.
As perdas foron demasiado castigo para as visitantes, ante unha defensa férrea das locais que decantou a balanza ao seu favor.
FICHA TÉCNICA
DURÁN MAQUINARIA ENSINO: Lizarazu (8), Natalie Van del Adel (6), Laura Aliaga (13), Helena Oma (10), Chatrice White (10) –cinco inicial–. Tamén xogaron: Alba Prieto (7), Alessandra Orsili (3), Georgina Bahí (5) e Sofía Gomes (10).
BAXI FERROL: Carmen Grande (16), Taylor Koenen (14), Milica Ivanovic (4), Jenna Allen (7), Sune Swart (2) –cinco inicial–. Tamén xogaron: Irene Garí, Dynn Leaupepe (15) e Natalia Rodríguez (5).
MARCADOR: 12-12, 22-13, 15-20, 23-18.
INCIDENCIAS: Partido correspondente á 27ª xornada da LF Endesa no Pazo de Lugo.
