Neste verán a SD Torre, en colaboración coa Fundación Emalcsa, encárgase de acoller o deporte inclusivo na cidade da Coruña. Esta fin de semana celebra o XXI Torneo Internacional Club Torre – Hyundai Finisterre Motor e as actividades sociais do VI Programa Solidario de Deporte Adaptado e Inclusivo Club Torre.
Na competición internacional, que se disputa na Cidade Deportiva da Torre, participan 32 equipos de distintos clubs da cidade, así como un representante de Senegal.
Debido aos protocolos, a presente edición desenvolverase sen público, non como noutras edicións. “Outros anos cheábase isto, con moito colorido, bandeiras… Pero este ano ten que ser así”, recorda Antonio Dubra, presidente do club.
Dentro da programación do evento solidario e de deporte inclsusivo, engádense actividades como:
- O IV Mundialito da Integración: Un campionato con 24 equipos procedentes de distintos países a modo de mundialito. Nesta cuarta edición, haberá presenza de conxuntos femininos.
- VI Xornadas Solidarias de Deporte Adaptado e Inclusivo: Campus multideporte gratuito, orientado a nenas e nenos en risco de exclusión social, de orixe migrante e xoves con discapacidade ou capacidades distintas.
- II Torneo Genuine Club Torre: Dirixido a xente nova con distintas capacidades, en convenio con Aspronaga e Down Coruña.
- Torneo II Marcha Mundial pola Paz e a Non Violencia e XIV Memorial Orlando García: Competicións triangulares nas categorías de afección e veteráns, co principal obxectivo da recollida de tapóns solidarios para a Asociación de Axuda a Superar Enfermedades Raras (ASER).
O club SD Torre participa ademais nun proxecto de axuda ao desenvolvemento na localidade de Yenne en Senegal.
O Portazgo vence na competición feminina
Na primeira competición de deporte inclusivo celebrada este sábado, o Portazgo proclamouse campión do torneo feminino, superando a Orillamar, que rematou en segunda posición, e aos dous equipos do SD Torre, que quedaron terceiro e cuarto.
