A Unión de Federacións Deportivas Galegas (UFEDEGA) ven de presentar o seu informe do 2020, un ano “atípico” e que “presentou importantes retos para o deporte federado galego”. No escrito, destacan a unión das distintas disciplinas deportivas en Galicia e o crecemento da propia organización.
A UFEDEGA explica que traballou ao longo do ano no asesoramento e colaboración na elaboración de protocolos sanitarios por mor da pandemia de COVID-19 e a colaborou na formación e establecemento de espazos de reunión. De cara o novo ano, un dos obxectivos é “traballar nun convenio laboral propio para os traballadores das Federacións“.
Como nota positiva entre tantas dificultades vividas no 2020, desde a asociación subliñan que a UFEDEGA engloba xa ao 85% das Federacións de Galicia, o que permite avanzar na dixitalización dos asociados.
E, como non podía ser doutra forma, o organismo destaca que ao longo do ano traballouse na elaboración de protocolos para garantir a seguridade na volta ás prácticas deportivas, desde as autonómicas ata á base.
En colaboración coa Secretaría Xeral para o Deporte, a UFEDEGA impulsou tamén a realización de tests en Galicia, establecendo sempre espazos seguros para as deportistas.
Tal e como indican no informe, os últimos datos do Centro de Coordinación de Alertas e Emerxencias Sanitarias do Ministerio de Sanidade, correspondentes á Actualización 265 do 4 de decembro, afirman que, “desde a desescalada, só un 0,4% dos gromos tivo orixe en actividades deportivas”.
Desde a organización recordan que “o deporte é saúde e que, ante estes tempos difíciles, é preciso seguir forte co deporte”.
