O Dépor ABANCA ten que evitar, como sexa, unha nova derrota. Nunha tempada nefasta na que o equipo branquiazul non é capaz de puntuar, o parón de seleccións pode supoñer un antes e un despois. Algo que só se saberá tras o encontro deste sábado, 5 de decembro, que enfronta ao Eibar contra o Dépor ás 12:00 horas.
O amistoso fronte ao Viaxes Interrías cargou as pilas do conxunto herculino, polo que tentarán trasladar esas boas sensacións ao terreo de xogo do Eibar. Un cadro que confía no factor de xogar en casa para seguir escalando postos na táboa da Liga Iberdrola e escapar das últimas posicións, onde o Dépor ABANCA é o colista.
Por iso, Manu Sánchez considera que esta é “a hora da verdade, de asumir e cambiar certas cousas” e o “momento de dar un golpe e demostrar que non somos o equipo que dia a táboa”.
Manu Sánchez: “É o momento de demostrar que non somos o equipo que di a táboa”
Sanchez prevé un partido “complicado”, contra un rival superior. Esta non é a primeira vez que galegas e vascas enfróntanse. Xa o fixeran nun amistoso, polo que o técnico branquiazul coñece o modus operandi do xogo do Eibar. “É un rival complicado no seu campo. Son fortes, pero imos buscar as súas debilidades. É un equipo que busca unhas transicións moi rápidas, unha intensidade moi alta cun fútbol de guerra. Veremos se nós podemos dar tamén a nosa parte de guerra e de calidade, que tamén a temos”, declarou.
A herba artificial, outro atranco
Outro obstáculo a superar será xogar nun campo de herba artificial, “que complica un pouquiño máis as posibles lindezas que haxa no campo”, expresa Sánchez.
O Eibar, ás ordes de Iker Dorronsoro, é un conxunto que pelexa polo resultado ata o final e non se rinde. Tampouco o fai o Dépor. O seu técnico ten claro que para revertir a mala racha de derrotas que as ten ancoradas á última posición, o importante é “non baixar os brazos nin deixar de intentalo. Hai que traballar, buscar a solución e animar ás xogadoras, que son as que teñen que sacalo no campo”.
Así, o Dépor arriscara a probar solucións futbolísticas novas para unha situación nova. E é que o equipo coruñés non está habituado aos malos resultados e o plantel “non está deseñado” para ter que afrontar este tipo de situacións. Con todo, “nós, como equipo de fútbol profesional, temos que estar preparadas para isto”.
Sullastres e Kenni son baixa no Dépor ABANCA
Para este reencontro cos campos da Liga Iberdrola, Manu Sánchez terá a súa disposición a todas as xogadoras agás dúas: Sullastres e Kenni. A primeira “levaba xa varias semanas arrastrando un problema no ombro un pouco complicado” e a segunda, “ten un problema muscular na cadeira”.
Polo tanto, ningunha destas branquiazuis participarán na plan de viaxe das deportivistas. A expedición sae da Coruña o venres ás 13:00 horas para chegar ás 20:00 horas ao hotel de Eibar. A volta está programada para cando finalice o partido, que comezará ás 12:00 horas do sábado.
#ASNOSAS convocadas para unha nova xornada de #PrimeraIberdrola. Mañá ás 12:00 h. en Unbe: #EibarDéporABANCA#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/kB77sbHpwj
— RC Deportivo (@RCDeportivo) December 4, 2020
