A corentena dunha quincena de xogadoras do Dépor ABANCA chega ao seu fin para a maioría. Despois de verse obrigadas a pasar un illamento de 10 días por ser contacto estreito dun positivo en COVID-19, as branquiazuis volverán a Abegondo.
O equipo xa comezara este luns a semana de traballo, pero só con cinco xogadoras, polo que desde hoxe, mércores 13/1/21, o plantel dirixido por Manu Sánchez volverá case á normalidade. Todas as futbolistas estarán dispoñibles tras pasar unha PCR negativa, excepto unha, que seguirá en corentena seguindo os protocolos establecidos.
Desta forma, o Dépor ABANCA adestrará na tarde deste mércores 13, desde as 17:30 en Abegondo. O traballo non consistirá en preparar un partido xa que, ao aprazar o encontro ante o Rayo Vallecano da Liga Iberdrola, previsto para este mesmo mércores, a seguinte cita non será ata o 24 de xaneiro, ante o Valencia FCF.
Segundo informa o club coruñés na súa web, a axenda da semana queda da seguinte forma:
- Mércores, 13 de xaneiro – adestramento ás 17:30 horas
- Xoves, 14 de xaneiro – adestramento ás 17:30 horas
- Venres, 15 de xaneiro – adestramento ás 17:30 horas
- Sábado, 16 de xaneiro – adestramento ás 10:00 horas
- Domingo, 17 de xaneiro – descanso
A RFEF confirma o adiamento do partido do Dépor ABANCA ante o Rayo Vallecano
O partido ante o Betis xa ten data
O Xuíz de Competición da Real Federación Española de Fútbol decretou xa o día no que o Dépor ABANCA e o Real Betis recuperarán o partido da 15ª xornada. Será o 14 de febreiro, ás 17:00 horas, na Cidade Deportiva de Abegondo.
