Segundo compromiso da semana do Dépor ABANCA e segunda oportunidade para seguir puntuando e saír da zona de descenso. As branquiazuis viaxan a terras andaluzas para enfrontarse ao Sporting de Huelva na 31ª xornada da Primera Iberdrola. O partido será este domingo, ás 12:00 horas, no Campo Federativo de la Orden.
Este será o segundo duelo seguido que as futbolistas de Manu Sánchez disputen lonxe do seu fortín de Abegondo e o farán nun campo de herba artificial. O pasado mércores as coruñesas rascaron un punto ante o Atlético de Madrid, e este domingo precisan seguir sumando se queren manterse con opcións de salvar a categoría.
A falta de catro xornadas para finalizar a competición, as herculinas son decimoquintas, cun total de 25 puntos obtidos en sete vitorias e catro empates. No apartado goleador, son o conxunto con maior diferenza de goles recibidos e anotados, con 74 dos primeiros e só 34 dos segundos, perfilándose como o club que máis tantos en contra sufre da categoría.
Co reparto de puntos no Real Betis – Rayo Vallecano e a derrota do Espanyol ante o Barça, as xogadoras do Dépor ABANCA son o equipo mellor posicionado para saír da zona de descenso. O primeiro equipo salvado, o Eibar, está a cinco puntos das coruñesas coa 31ª xornada xa disputada, na que perdeu ante o Valencia.
Para o encontro ante o Sporting Huelva, as branquiazuis prefiron centrarse só no seu propio partido e confiar nas súas posibilidades de salvación, sen mirar aos rivais. A gardameta Esther Sullastres pasaba esta semana por rolda de prensa, onde asegurou que “o primeiro é gañar e logo estar pendentes”.
Sullastres: “Cremos no que facemos, no noso xogo e no noso sistema”
O rival desta fin de semana non o porá nada fácil. As andaluzas aínda non teñen certificada a permanencia, algo que poderían conseguir de gañar ao Dépor ABANCA no seu propio campo. Como equipo local, o Sporting de Huelva venceu en oito ocasións e empatou nunha, das 15 citas que disputaron no Campo Federativo de la Orden.
Actualmente son undécimas, cun total de 35 puntos ao seu favor, dez máis que as galegas. Ademais, vén dun bo momento deportivo. Nos últimos cinco encontros as andaluzas sumaron en todos, acadando tres vitorias e dous empates.
A convocatoria do Dépor ABANCA
Para esta nova xornada, Manu Sánchez recupera a Stephannie Blanco, quen xa cumpriu a súa sanción, e contará con todo o plantel agás Carolina Arbeláez, lesionada, e Carlota, con gripe. Para completar a convocatoria, o adestrador conta tamén coa xa habitual canterana Eva Dios, e Patri López, que leva na dinámica do primeiro equipo desde o comezo da tempada.
