A ocasión é inmellorable para escalar na táboa e emprender a fuxida dos postos de cola. Mentres o Dépor ABANCA visita ao colista, os seus inmediatos predecesores na clasificación, Real Betis e Santa Teresa mídense a UDG Tenerife Egatesa e Madrid CFF respectivamente. En ambos os dous casos, rivais da zona media – alta. Polo que lles custará puntuar.
Así, coa única baixa de Carolina Arbeláez afronta o Dépor ABANCA a súa visita a Las Gaunas, un campo clásico do balompé español. Alí espéralle o faroliño vermello, o EDF Logroño, ao que as galegas aspiran a vencer para seguir na súa liña ascendente e escapar da queima dos postos de descenso. O cruce está marcado para as 12:00 horas de mañá domingo 21 de marzo e o encontro pertence á xornada 23ª da Primera Iberdrola.
O técnico das rioxanas, Javier Moncayo, citou para enfrontarse ás deportivistas as seguintes 20 futbolistas
📋✅ ¡Nuestras 20 jugadoras convocadas para el partido 🆚 @RCDeportivo !
.#SomosEDF🍇 | #EDFLogroñoDeportivo pic.twitter.com/GVaLU2SOz9— EDF Logroño Femenino (@edflogronofem) March 20, 2021
Mentes que a convocatoria do Dépor ABANCA que fixo Manu Sánchez está conformada polas seguintes xogadoras branquiazuis: Esther Sullastres, Noelia Villegas, Stephannie Blanco, Iris Arnaiz, Michelle Romero, Athenea del Castillo, Alba Merino, Kika Moreno, Gaby, Noe Bermúdez, Helena Torres, Lorena Bedoya, Lady Andrade, Peke, Ainoa, Cris Martínez, Patri López e Eva Dios.
Xustamente a achega da canteirana Eva Dios foi salientada por Manu Sánchez na súa comparecencia previa ao partido contra o EDF Logroño. O técnico deportivista apuntaba que a futbolista foi para el “unha das xogadoras destacadas” no último partido disputado, no que o RC Deportivo ABANCA vencía ao Rayo Vallecano 3-0.
“Estamos falando dunha nena que aínda se está afacendo aos ritmos e aos tempos da Primeira División”, matizaba o adestrador sobre Eva Dios. Manu Sánchez puña en valor que nunha “posición moi atípica para ela, deunos moitísimo traballo en defensa e desequilibrio desde fóra. Estamos moi contentos con ela. Haille que dar tempo para que vaia dixerindo todo isto, a realidade que ten agora. Eva ten a cabeza bastante ben amoblada. Sabe que esto é Primeira División. Se estás á altura, estás, se non o estás, tes que traballar para estalo. Esa é a mensaxe que lle mandamos e a acepta ben”.
Javier Moncayo: “O Deportivo leva unha traxectoria ascendente”
O adestrador do EDF Logroño, Javier Moncayo, comparecía ante os medios para reafirmarse na súa intención de ir a polos tres puntos diante do Dépor. “Buscamos a vitoria”, sinalaba. “Levamos unha dinámica con empates ante rivais da zona alta e imos con boas sensación á disputa dos tres puntos en Las Gaunas”.
O club viño tinto reforzouse nos últimos meses coa chegada de futbolistas como a media punta Shameeka Fishley, unha británica que xogou no Chelsea antes de cruzar o charco e militar na liga estadounidense, e que posteriormente estivo na serie A italiana, e na liga de Islandia. Outro dos reforzos foi a dianteira Lova Lundin, sueca procedente do Umea IK. Polo que as rioxanas recargaron a súa zona de ataque para conseguir maior pegada e efectividade nesta recta final da competición.
Consciente de que o rival é un contrincante directo na loita pola salvación e que tamén acude ao enfrontamento con boas sensacións, o técnico das logroñesas apelaba ao factor cancha e ao alento do público. Declaraba Javier Moncayo que o conxunto galego “leva tamén unha traxectoria ascendente. Saíu dunha situación na que agora estamos nós, pero xogamos en Las Gaunas. Temos posibilidades de conseguir os tres puntos aínda que elas leven unha boa dinámica. O público da puntos. O outro día empurrounos e espero que este domingo tamén o faga”.
Javier Moncayo apuntaba que o bloque que adestra vese capaz. “Vexo ás miñas xogadoras moi mentalizadas, moi involucradas e con fame de lograr unha vitoria que hai tempo que non acadamos. O noso plantexamento só se basa na vitoria”, advertía. “Queremos manter a nosa portaría a cero e acadar un mellor balance ofensivo, aí estamos escasas”, admitía o preparador do EDF Logroño.
🔊 @JJmoncayo : ”Veo a las jugadoras muy involucradas, muy mentalizadas y con mucho hambre de conseguir una victoria”
🔜🆚 @RCDeportivo https://t.co/ltEGF4VOYE— EDF Logroño Femenino (@edflogronofem) March 20, 2021
Manu Sánchez: “Teñen diferentes armas, imos ver que leva o gato á auga”
Pola súa parte, na rolda de prensa previa a o desprazamento, Manu Sánchez opinaba sobre o conxunto rioxano destacando que “ten unha moi boa base de traballo”. Nese sentido destacou o labor desenvolvido polo ex adestrarod Gerardo García “tanto o ano pasado como este, fixo que fose un equipo que nos encandeou a moitos. Sobre esa base agora Javier Moncayo está pincelando a súa estrutura”, analizaba o preparador coruñés.
Non vai confiado o técnico coruñés a medirse as Escuelas de Fútbol Logroño, un equipo do que advirte: “pode desenvolver diferentes armas, estilos…”. Con todo, Manu Sánchez é precavido pero ambicioso e optimista e remataba a súa reflexión sobre o conxunto rival do RC Deportivo ABANCA dicindo “Imos ver quen se pode levar o gato á auga”.
Ambos conxuntos teñen as ideas claras e o traballo feito entre semana, así que está preparados para medir forzas sobre o tepe. Como apuntaban neste chío desde o conxunto viño tinto, todo está xa listo tamén en Las Gaunas. Será, a todas luces un enfrontamento no que ambas as dúas escuadras son conscientes do que se xogan no campo e de que deberán deixarse a pel nesta cancha mítica do fútbol español, para loitar pola permanencia na elite do fútfem estatal. O espectáculo está garantido, aínda que, nesta ocasión, non haberá televisión para poder seguir a As Nosas deportivistas na distancia.
👊🏻✊🏼 Todo listo en #Logroño para el último #entrenamiento antes de enfrentarnos al @RCDeportivo en el partido correspondiente a la @PrimerIberdrola
.#VamosMiLogroño #HastaElUltimoMinuto #FamiliaVinoTinto pic.twitter.com/jbdwxN0rXD— EDF Logroño Femenino (@edflogronofem) March 20, 2021
Xa se xogaron catro partidos da xornada 23ª
En xornada de sábado xa se disputaron os seguintes cruces desta vixesimo terceira xornada de liga na Primera Iberdrola:
- Athetic Club – Valencia FCF 2-0
- SD Eibar – RCD Español 0-1
- Sporting de Huelva – At. Madrid 1-0
- Rayo Vallecano – FC Barcelona 0-4
Para a xornada dominical restan os seguintes enfrontamentos:
- Real Betis Balonmpié – UDG Tenerife Egatesa
- CD Santa Teresa – Madrid CFF
- Real Sociedad- Sevilla FC
- Real Madrid – Levante UD
- EDF Logroño – RC Deportivo ABANCA
Arbeláez foi intervida no Quirón
Polo que respecta á única baixa deportivista nesta xornada, a colombiana Carolina Arbeláez foi sometida a unha intervención ambulatoria no Hospital Quirón Salud da Coruña para aliviar os problemas que ten no lombo. O seu entrenador no Dépor explicaba que a futbolista está “en tratamento cos médicos e xa comeza a ver o sol. Ese sol que se está a ver na Coruña estes días, tamén o ve ela. Estamos moi contentos de que vai a mellor”.
