Acadada a vitoria ante o Sporting de Huelva, o Dépor ABANCA sitúase a tres puntos para saír da zona de descenso. Outro trunfo que pode conseguirse este domingo, ás 11:00 horas (Gol) na súa visita á Real Sociedad. Un duelo nada doado, xa que as vascas son un rival forte como local.
Na súa viaxe a San Sebastián, as branquiazuis buscan a oportundiade de lanzarse na clasificación e ser firmes candidatas á permanencia. Polo de agora, o Dépor ABANCA aínda é colista, pero a permanencia na Liga Iberdrola xa está moito máis preto.
Un gol que vale un mundo e deixa ao Dépor a un trunfo da salvación
Porén, esta xornada ponse costa arriba. O Real Sociedad é o terceiro mellor equipo como local, só por detrás de Real Madrid e Barcelona, xa que das dez ocasións que xogou en casa venceu en 7, empatou en dúas e só perdeu ante o Granadilla Tenerife.
Outro punto a favor das anfitrioas é a súa posición na táboa, sendo sétimas con 34 puntos (23 sumados en casa), polo que afrontan con tranquilidade o que resta de tempada.
Precedentes branquiazuis
A futbolista das branquiazuis vascas Ana Tejada, declarou en rolda de prensa que as branquiazuis galegas “non están facendo a mesma tempada que a anterior, pero é un rival igualmente difícil. Na primeira volta fixemos un gran partido. É verdade que era o noso primeiro partido e fumos con moitas ganas. Esta xornada intentaremos ir coas mesmas ganas”.
Neste primeiro encontro o partido rematou nun 0-2 a favor da Real Sociedad, nun duelo que as visitantes mereceron gañar. Para esta nova xornada, será a primeira vez que o Dépor ABANCA visite o estadio vasco, xa que o partido de volta da tempada anterior non se puido disputar por mor da pandemia.
Un Dépor con marxe de mellora cae en Abegondo diante dunha Real moi seria (0-2)
Reencontro con Nuria Rábano
En Zubieta estará agardando unha exdeportivista. Nuria Rábano milita esta tempada como branquiazul, pero no conxunto vasco. A lateral compostelá reencontrarase coas súas excompañeiras, coas que xogou ata a pasada tempada despois de catro anos vestindo a camiseta do Dépor ABANCA.
Este domingo no jugamos un partido cualquiera… 🔜⚽ Siempre será especial enfrentarme a vosotras @RCDfem @rcdeportivo 💙
Vamos a por más, #AurreraReala 🔵⚪ @realsociedadfem pic.twitter.com/Kgwa3S1PqT
— Nuria Rábano (@nuriaablanco11) March 5, 2021
As baixas no Dépor ABANCA
Manu Sánchez repite convocatoria para esta nova xornada, mantendo as baixas de Carolina Arbeláez, por molestias no lombo, Noelia Villegas, con molestias no aductor e Lady Andrade, que segue en fase de recuperación por un golpe no xeonllo.
Ao xogar a domicilio, a lista pasa de 20 a 18 xogadoras, así que caen tamén as canteranas Tati e Sara Álvarez.
