Na conta de Twitter do RC Deportivo dábase o resultado final do partido do Dépor ABANCA diante da SD Eibar 2-4 botando man dun clásico do refraneiro galego: “Nunca choveu que non escapara”. O xiro está moi aquelado xa que este primeiro triunfo deportivista chega nunha xornada marcada polos temporais e as fortes choivas, pero tamén porque a paciencia das branquiazuis empezaba a fraquear.
Fiiiiinaaaaal do #EibarDéporABANCA en Unbe 2-4! Os 3 primeiros de moitos máis!
Forza #asnosas! Nunca choveu que non escampara porque #TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/i2OkwYKFTj
— RC Deportivo (@RCDeportivo) December 5, 2020
Xunto á referencia ao refraneiro popular galego, está a frase promocional da campaña de aboados deste ano no club coruñés “Toca volverse mollar”. O lema ten sido case unha advertencia cara a esta campaña 2020 – 2021. É certo que a referencia era cara a aquel diluvio da Copa do masculino no 95 e tamén unha chiscadela ao descenso do equipo que adestra Fernando Vázquez, pero ao final, as que peor o estaban pasando nesta tempada eran as rapazas do Dépor ABANCA que non atopaban o seu xogo divertido, alegre e rápido de anos previos. A afección mollouse con elas, elas molláronse polas cores e, ao fin, chega os ansiados primeiros tres puntos.
O Dépor ABANCA leva xornadas á procura de volverse a ver no espello, de ser un equipo con chispa, con gol e con mordente. E por fin, acadouno. Foi chegar e encher. Nada máis sacar de centro fragouse a primeira xogada de ataque que Peke transformou en gol. O partido púñase 0-1 no seu nacemento.
Xusto o que lle viña pasando ás coruñesas en xornadas previas, o vivía agora o seu rival. Recibir gol no comezo de partido descoloca, desubica e mina a moral. O Dépor ABANCA aproveitou eses minutos para buscar aumentar a súa conta anotadora. Ambiciosas e cun fútbol que buscaba aporta contraria, as galegas tentaban sorprender á súa excompañeira, a porteira pontesa Malena Mieres.
A SD Eibar logra remontarlle ao Dépor ABANCA e pórse 2-1
Aos poucos o Eibar recompúxose e tivo no balón parado o seu aliado para xerar perigo. O gol do empate chegaría no minuto dez das botas de Sara Navarro a pase de Thembi 1-1.
Consumidos 20 minutos de partido as locais anotaban o segundo e outra vez o RC Deportivo ABANCA sentía que o control do choque e o posible triunfo se lle escorrentaba entre os dedos. O 2-0 foi obra de Arola Aparicio.
As chegadas do tridente atacante conformado por Athenea, Gaby e Peke volveu carburar como noutrora e as súas aproximacións levaron perigo á meta de Malena Mieres.
Co 2-1 chegouse a o descanso. O partido seguiu estando moi disputado por ambas as dúas escuadras que buscaban asegurar o triunfo dun lado e darlle a volta ao marcador no outro. O gato á auga levouno o Dépor cun remate de Gaby a centro de Cris que colocou o partido de novo 2-2 e con todo por decicir.
O reencontro coa efectividade de PekeGol
Coas táboas no marcador o olfato de de PekeGol volveu ás andadas e a xogadora deportivista asinou o terceiro para As Nosas branquiazuis 2-3.
Con case 30 minutos por diante, nada estaba decidido pero as galegas acariñaban o desexado primeiro triunfo. Non ían consentir que, desta volta, se llo quitaran diante dos fouciños (como diría un ilustre do deportivismo: Arsenio Iglesias).
O 2-4 foi froito da transformación dunha pena máxima cometida sobre Athenea del Castillo que transformaría Alba Merino batendo a Malena Mieres. Aínda tería precisamente Alba Merino outra acción de perigo nas súas botas, pero o tiro fóiselle algo desviado e as coruñesas non puideron ampliar a ventaxa. Os dous goles arriba que campeaban no electrónico da cancha de Unbe abondaron para que as galegas poidesen, por fin, sumar e facelo de tres.
Camiño do desenlace no #EibarDéporABANCA en Unbe!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/tS7DjIWfyt
— RC Deportivo (@RCDeportivo) December 5, 2020
As futbolistas que adestra Manu Sánchez dan deste xeito un primeiro paso cara a conseguir manter a categoría na elite estatal. A segunda volta da Primera Iberdrola das branquiazuis terá que ser radicalmente diferente á primeira, non queda outra.
FICHA TÉCNICA:
SD EIBAR: Malena, Queralt, Aizpurua (Rodríguez, min. 87), Llompart, Aida (Campos, min. 75), Gantxegi, Mar (Ruth, min. 75), Thembi, Arola, Navarro (Jujuba, min. 65) e Sheila (Arene, min. 45).
RC DEPORTIVO ABANCA: Noelia, Cris, Ainoa, Blanco, Villegas, Iris, Alba, Arbeláez, Gaby, Athenea (Michelle, min. 87) e Peke (Helena, min. 90+2).
GOLES: 0-1 Peke (min. 1); 1-1 Navarro (min. 10); 2-1 Arola (min. 20); 2-2 Gaby (min. 55); 2-3 Peke (min. 62); 2-4 Alba (min. 72, de penalti).
ÁRBITRA: Sánchez Miguel, do colexio catalán. Amonestou ás seguintes futbolistas: Iris (min. 29); Sheila (min 30); Arene (min. 47); Athenea (min. 57); Mar (min. 68) e Blanco (min. 77)
INCIDENCIAS: Partido correspondente á décima xornada da máxima categoría do fútbol feminino español, a Primera Iberdrola, disputado no campo nº 5 do complexo deportivo Unbe. Debido ás restricións de aforo por mor da pandemia de COVID-19, o encontro celebrouse a porta pechada.
