Cae o Dépor ABANCA en Abegondo e suma catro derrotas seguidas, algo inédito para as galegas en Liga. As deportivistas acudían ao cruce co Santa Teresa con baixas significativas en diferentes liñas. A primeira parte non amosou a súa mellor faciana e, pese a que na segunda o xogo branquiazul mellorou moito, acabou pagandoo cunha derrota por 1-2 na casa. A boa nova foi o debut co primeiro equipo coruñés da xogadora galega do filial Eva Dios.
Quecemento rematado en Abegondo! Ás 13:00 h., #DéporABANCASantaTeresa #TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/s2kZdkzDE7
— RC Deportivo (@RCDeportivo) October 31, 2020
O conxunto deportivista chegaba ao cruce coas destadas ausencias de Peke, Arbeláez, Cris e Kenni. A cambio entraban na convocatoria rapazas do segundo equipo: María Calvo, Tati e Eva Dios, quen remataría por ter minutos.
As coruñesas recibiron o primeiro gol antes de cumplirse os dez minutos de xogo. O 0-1, obra de Mascaró, xurdía dun pase en profundidade de Belén ao que Patri Mascaró foi quen de sacar proveito ao vencer no man a man á cancerbeira local Noelia Bermúdez.
Coa defensa máis adiantada do habitual, o Dépor ABANCA deixaba ocos na zaga que as estremeñas utilizaban para levar perigo á meta deportivista. Ademais as de Manu Sánchez estaban obrigadas a buscar a remontada e adiantar liñas. Pero as coruñesas ían a remolque no marcador fronte a un rival que agardaba cómodo a súa oportunidade cun resultado que lles era favorable no electrónico de Abegondo.
Quecemento rematado en Abegondo! Ás 13:00 h., #DéporABANCASantaTeresa #TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/s2kZdkzDE7
— RC Deportivo (@RCDeportivo) October 31, 2020
Intentos sen éxito e novo mazazo
As herculinas volcáronse na área rival con intentos de Kika Moreno, Iris Arnáiz e Noelia Villegas. Pero Yolanda Aguirre estivo expléndida baixo paus e conxurou o perigo da súa meta unha vez tras outra.
Sen embargo, xusto canto máis o tentaba o Dépor ABANCA, chegou o segundo do Santa Teresa. Xustamente Belén, que dera o pase no primeiro tanto, foi quen asinou o segundo tanto das estremeñas. Corría o minuto 31 e esa volta a sacar de medio campo supuxo un mazazo anímico ás coruñesas 0-2.
Tras o paso por vestiarios quedaban na caseta Gaby e Kika, deixando o seus postos para Lady Andrade e a galega Lía Muíños. Manu Sánchez quería que o seu Dépor mandase sobre o tepe abegondés, e conseguiu. Os segundos 45 minutos foron de dominio branquiazul.
Chega o premio do gol pero non evita a derrota
Foi precisamente unha combinación entre Lady Andrade e Helena Torres (que entraba no equipo nesta xornada) a que transformou o control do xogo local en gol. Andrade entrou pola zona de extremo esquerdo e enviou o esférico á área pequena onde Torres so tivo que empuxala para poder achegar ás branquiazuis no marcador 1-2.
O Dépor ABANCA seguiu mandando e colleitando ocasións, pero o empate non chegaba. Alba Merino ou Lía foron algunas das que contaron con oportunidades claras diante de Yolanda Aguirre. De feito, a ocasión máis clara foi de Alba Merino xa en tempo engadido. Pero ás veces a redonda non quere entrar, e hoxe foi un deses días. O partido rematou cun resultado de 1-2 e derrota para as locais.
A nota positiva, o debut de Eva Dios
Que unha xogadora do filial debute co primeiro equipo é sempre unha boa nova. Hoxe foi un deses días para festexar o paso adiante dunha futbolista do segundo equipo branquiazul. No minuto 75, Helena Torres, autora do gol, deixaba o seu sitio no campo a Eva Dios.
#DéporABANCASantaTeresa: cambio n #asnosas no minuto 75, Eva Dios entra no lugar de Helena Torres#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/PiD3Ofk8lx
— RC Deportivo (@RCDeportivo) October 31, 2020
Trátase dunha deportistas da Illa de Arousa que chegou ao Dépor ABANCA B logo dunha traxectoria deportiva na que o fútbol sala e o fútbol 11 conviviron, como sucede noutros moitos casos. Empezou xogando co Céltiga cando era unha nena. Defendeu as elásticas do Portonovo, Victoria FC e Viajes Interrías. No fútbol sala chegou a militar no Poio Pescamar e no O Fisgón de Marín.
Eva Dios, ten dificultades auditivas. A sordeira nunca foi un problema para esta futbolista que goza acariñando a redonda e que hoxe deu un paso máis na súa carreira deportiva ao debutar na máxima categoría do fútbol español.
O Dépor, coa mirada posta no seguinte reto
Xa o dicía en rolda de prensa antes do partido Manu Sánchez, o Dépor ABANCA ten diante de si quince días de non parar. Así que se tempo a dixerir o resultado co Santa Teresa CD, mañá mesmo As Nosas deportivistas voltan ao campo. Están citadas ás 10:00 horas no mesmo escenario onde hoxe caían derrotadas, a Cidade Deportiva de Abegondo. O mellor lugar para volverse erguer.
O calendario de competición chega apretando ás futbolistas da Primera Iberdrola. No caso das deportivistas, toca preparar o cruce que terán o vindeiro mércores, 4 de novembro ás 16:00 horas nada menos que co Real Madrid. As branquiazuis visitan ás merengues, o conxunto no que milita este ano a galega ex deportivista Tere Abelleira.
Ao final do partido, na súa conta de Twitter o técnico coruñés, Manu Sánchez. reflexionaba asumindo que a situación do equipo non é a idónea pero mirando cara ao futuro. Concretamente facía exame de conciencia, non tiraba balóns fóra e explicaba: “Moi consciente de que lle estamos a fallar ao deportivismo. Pero sobre todo a nós mesmas. Este é o noso inicio. Na nosa man está mudar o camiño e o final. Mañá, a partir das 10:00 horas, empezamos…”
Muy conscientes de que le estamos fallando al deportivismo
Pero sobretodo a nosotras mismas
Este es nuestro inicio
En nuestra mano está cambiar el camino y el final
Mañana a partir de las 10h empezamos… pic.twitter.com/Q1tUIEINX8— Manu Sánchez (@ManuSanchez04) October 31, 2020
A resposta da afición deportivista ao chío do míster non se fixo esperar. Pese á derrota, e conscientes que xa van catro seguidas, da reflexión do adestrador penduran unha morea de mensaxes de alento. Abundan as palabras como “ánimo”, “Imos” ou mensaxes como “quen dixo medo”, “confiamos no voso traballo” ou “nas malas, moito máis”.
Unha vez más, a afección branquiazul amosa o seu respaldo incondicional As Nosas deportivistas.
FICHA TÉCNICA
RC DEPORTIVO: Noe Bermúdez, Patri López (Michelle, min 85), Ainoa, Blanco, Noelia Villegas, Alba, Iris Arnáiz, Gaby (min 46, Lía), Kika Moreno (Lady Andrade, min 46), Helena Torres (Eva Dios, min 75) e Athenea del Castillo.
SANTA TERESA: Yolanda Aguirre, Caeley Lordemann, Parralejo, Van Slambrouck, Mascaró (Lisette Tammik, min 64), Estefa, Belén, Mireya (Nayadet, min 64), Raquel Ayuso, Blanca (Sini Laaksonen, min 89) e Amanda Visco.
GOLES: 0-1, min 9: Mascaró; 0-2, min 32: Belén; 1-2, min 54: Helena Torres.
ÁRBITRO: Olatz Rivera Olmedo. Amosou cartón a Alba M. (7′) e Ainoa (51′) por parte do RC Deportivo ABANCA E e Belén (22′), Mascaró (38′) e Caeley Lordemann (55′) do Santa Teresa CD.
INCIDENCIA: Partido correspondiente á 4ª xornada da Primera Iberdrola disputado na Cidade Deportiva de Abegondo. Xogouse a porta pechada por mor da situación sanitaria a causa da pandemia de COVID-19.
