O Dépor ABANCA está a pisar forte na Reto Iberdrola. Despois da estrea con vitoria en Abegondo, as pupilas de Miguel Llorente vencen de novo, esta vez a domicilio ante o Seagull (0-2).
Na súa primeira viaxe fóra de casa, as deportivistas non defraudaron e volveron a sumar tres puntos importantísimos nunha competición difícil. Con goles de Paula Gutiérrez e Adule, as coruñesas volven a casa co equipo na parte superior da táboa.
O Dépor ABANCA vence e convence
Nos primeiros minutos, as galegas fixéronse co dominio do balón, e na primeira ocasión de gol, o equipo non fallou. Corría o minuto 7 cando Paula Gutiérrez colleu o balón centrado por Alba para disparar e anotar o primeiro tanto da tarde. Minutos despois, Ale Serrano tivo a súa oportunidade de facer o 0-2.
Porén, as catalás recuperáronse e contiveron os ataques deportivistas. Inés Altamira tivo tamén a súa ocasión despois dun centro de Paula, cun lanzamento que quedou a centrímetros da meta rival.
Antes do descanso, o Seagull mostrou uns primeiros ataques perigosos, obrigando a Ana Valles a intervir para evitar o gol catalán. Porén, a última antes do pitido do árbitro foi de Ale Serrano, quen estivo a piques de facer o 0-2.
Despois do paso por vestiarios, María Ruiz e Alba estiveron preto de facer o segundo para o Dépor ABANCA. A dianteira tivo a súa oportunidade de golear, recibindo da centrocampista. Minutos despois, outra xogada de Alba deixáballe unha gran oportunidade a Ruiz, pero o balón pasou por riba do traveseiro.
De novo Alba, a falta de media hora para o final, obrigou á gardameta local a esforzarse para evitar o gol deportivista. Intres despois, Adule, que debutaba neste partido, anotou un tanto irreglamentario.
A xogadora do Dépor ABANCA puido desquitarse uns minutos despois, recibindo en carreira un pase en profundidade, e marcando baixo as pernas de Itziar Martínez.
Co 0-2, as deportivistas xogaban tranquilas, pero desexosas dun tanto máis. A tivo Eva Dios cunha vaselina e de novo María Ruíz cun disparo cruzado. Finalmente, o terceiro gol non chegou, pero si tres puntos que deixan ao Dépor ABANCA como terceiro clasificado.
FICHA TÉCNICA
CE SEAGULL: Itziar Martínez, Laura Ariza (Blanca García, min. 46), Maitane García, Joanna Vega, Alba Gordo, Nerea Valeriano, Rocío Serrano (Ana Hernández, min. 68), Alba Pomares, Andrea Alcaide, Andrea Martínez e Paula Navas (Julia Torregosa, min. 58 -Chari Márquez, min. 77-).
RC DEPORTIVO ABANCA: Ana Valles, Cris Martínez, Inés Altamira, Raquel García, Patri López (Goretti Neira, min. 73), Paula Gutiérrez, Jone Ibañez (Eva Dios, mi. 74), Alba (María Figueroa, min. 83), Ainhoa Marín, Alejandra Serrano (Adule, min. 73) e María Ruiz.
GOLES: 0-1 Paula Gutiérrez (min. 7); 0-2 Adule (min. 68).
ÁRBITRA: Borrás Polo (c. Catalán). Amonestou a Andrea Martínez (min. 63) e Rocío Serrano (min. 63).
INCIDENCIAS: Partido correspondente á 2ª xornada da Liga Reto Iberdrola disputado no Estadi Municipal de Badalona ante 300 espectadores, parte deles Deportivistas das peñas de Barcelona.