O Dépor ABANCA tiña a tiro de pedra recuperar o liderado do grupo norte da Reto Iberdrola, pero as xogadoras adestradas por Miguel Llorente só salvaron un punto nun partido sufrido ante o Zaragoza CFF. As locais fixeron sufrir ás galegas, que conseguiron o empate 2-2 nos últimos minutos do enfrontamento.
Con este resultado, as herculinas marchan en segunda posición, por detrás do Levante Las Planas, pero manténdose na loita polo posto de ascenso. As coruñesas suman 38 puntos fronte aos 39 das líderes e os 37 das terceiras clasificadas, o DUX Logroño.
O Dépor ABANCA sufriu para salvar o empate
Xa na previa do partido, o Zaragoza presentábase como un rival complicado para as deportivistas. Malia ocupar a zona media da táboa, as mañas conseguiran vencer recentemente ao líder no encontro de recuperación e cun novo adetrador supoñían unha ameaza para as herculinas.
Con todo, a primeira ofensiva foi do Dépor ABANCA, nunha acción de Ainhoa Marín que lle serviu de asistencia a Eva Dios pasados tan só uns segundos desde o pitido inicial, pero que non subiu ao marcador ao pitar a colexiada fóra de xogo. O rival reaccionou rápido e no minuto 3 Sampalo tivo que actuar baixo paos para evitar o gol local.
O Zaragoza sabía plantarlle cara a un Dépor ABANCA que tardou en poder dominar o xogo no verde aragonés. Non foi ata o minuto 20 cando as deportivistas tiveron de novo unha ocasión, unha vez máis con intervención de Marín. Un par de minutos despois, a canterana Dios puido adiantar ás súas, pero outra vez as locais desviaron o esférico.
A pelota foi a córner e no rechazo, Racheal Nachula tivo a oportunidade perfecta para adiantar ao conxunto local. A xogadora percorreu o campo para plantarse ante Sampalo e superala pola esquerda, poñendo o 1-0.
Como contrapunto, as de Llorente buscaron con máis enerxía o gol, chegando a xerar tres ocasións claras. Carlota a pase de Marín, Dios tras un balón de Altamira e esta ao borde do descanso estiveron preto de anotar, pero os goles non subían ao marcador.
O tanto que si modificou o resultado chegaría no 43, obra de Naima García para o Zaragoza. Despois dunha acción pola banda esquerda, as aragonesas asinaron un centro de Leitner ao que chegou García para facer o 2-0.
Tras a pausa, Llorente moveu ficha dando entrada a Aroa Guerra por Eva Dios, quen nesta xornada volvía á convocatoria despois dun período fóra do céspede por lesión. Nesta segunda parte, as ameazas deportivistas eran menores, pero as branquiazuis non deixaban de crear perigo na área rival.
Non foi ata o minuto 63 cando as coruñesas viron a luz ao final do túnel. Unha incansable Ainhoa Marín recibiu o balón e cedeulle no centro da área a María Ruiz, quen anotaría o primeiro tanto deportivista. Con traballo aínda por diante, o Dépor ABANCA seguiuno intentando, desta vez desde a distancia con disparos afastados.
A piques de rematar o partido, no minuto 87, Cris gañou un balón dividido en tres cuartos, fixo un pase en profundidade a Laura Fernández, quen non dubidou e anotou o 2-2. En busca de sumar puntos, o técnico das coruñesas deu entrada a Adule por Jone Ibáñez para xogar con dúas dianteiras e apostalo todo para marcar. O risco do Dépor ABANCA estivo preto de saír caro, cunha Naima García que non deixaba de axexar a Sampalo.
Finalmente, o electrónico non mudaría o resultado e deixou o partido en táboas con reparto de puntos.
FICHA TÉCNICA
ZARAGOZA CFF: Lisbeth Castro, Lucía Fuertes, Soro, Sara Balma, Annelie Leitner, Marta (Ketiš, min. 67), Naima García, Berg, Elena Valej (Lauren Curtin, min. 67), Shlapakova (Cara Curtin, min. 67) e Nachula (Irene Rodríguez, min. 86).
DÉPOR ABANCA: Sampalo, Cris, Inés Altamira, Raquel García, Andrea Sierra (Goretti, min. 53), Paula Gutiérrez, Jone Ibáñez (Adule, min. 88), Ainhoa Marín, Carlota (Laura Fernández, min. 78), María Ruiz e Eva Dios (Aroa Guerra, min. 46).
MARCADOR: 1-0 Nachula (min. 22); 2-0 Naima García (min. 43); 2-1 María Ruiz (min. 63); 2-2 Laura Fernández (min. 87).
ARBITRAXE: Andrea Fernández Fírvida (colexio aragonés). Sacoulle amarela a Marta (min. 64), Annelie Leitner (min. 71), ao adestrador local Samuel Luna (min. 73), Sara Balma (min. 80) e Aroa Guerra (min. 84).
INCIDENCIAS: Partido adiado correspondiente á 16ª xornada do grupo Norte de Reto Iberdrola disputado no Estadio Enrique Porta, en Villanueva de Gállego (Zaragoza).