O Dépor ABANCA ten unha nova cita ligueira de hoxe domingo 23 ás 12:00 en Abegondo ante o Real Oviedo, en partido correspondente á 27ª xornada en Primera Federación Iberdrola. O cruce poderá seguirse a través da canle de YouTube do RC Deportivo. “Imos tentar que os 3 puntos queden en casa e a partir de aí xa mirar cara a adiante”, comentou a adestradora deportivista.
Segundo explicaba na rolda de prensa previa ao partido a adestradora deportivista Irene Ferreras, o bloque branquiazul encara o cruce coas ovetenses “con tranquilidade e co foco no presente”.
Do Real Oviedo destacaba a adestradora madrileña que “é moi perigoso porque se xoga moitísimo e non pode fallar. Nós temos que mirar o noso, tentar facer un partido moi serio, controlar moi ben as súas transicións, o seu xogo directo. É un equipo que coa chegada de Joseba Aguirre cambiou moitísimo o seu estilo. Agora tenta chegar moito máis rápido, chega por fóra, centra, exponse menos; e nós ese tipo de partidos xa o habemos vivenciado. Maduramos moito á hora de xestionar ese tipo de situacións e temos que tentar estar precisas no noso xogo e moi alerta para tentar reducir as probabilidades que o rival che faga dano”.
O triunfo en Albacete da pasada fin de semana e o resto de marcadores da xornada deixou ás Nosas en 2ª posición da táboa, posto de ascenso directo, con 46 puntos, a 6 de distancia do FC Barcelona B, líder con 52 puntos pero que non pode ascender a Primera División pola súa condición de filial. Por detrás marchan CDF Osasuna e SD Eibar con 45 puntos; e CP Cacereño con 44 puntos.
A convocatoria do Dépor ABANCA
Irene Ferreras ten á súa disposición a todo o seu cadro; mentres que Paula Monteagudo será a representante do filial deportivista na lista de 18 futbolistas.
#AsNosas convocadas para a 27ª xornada de #PrimeraFederaciónIberdrola, o #DéporABANCARealOviedo de mañá ás 12:00 h. na Cidade Deportiva de Abegondo (📺 https://t.co/BRgppwOSdO e APP 📱 RC Deportivo)!
Tod@s a Abegondo a animar ás Nosas! 🎟 https://t.co/xTE3C6DZwV pic.twitter.com/bhEc5xIwDK
— RC Deportivo (@RCDeportivo) April 22, 2023
Na primeira volta, en partido da 2ª xornada disputado nas instalacións asturianas de Tensi o pasado 18 de setembro de 2022, o encontro acabou en empate (1-1). Paula Gutiérrez adiantou ao Dépor ABANCA aos 37 minutos de xogo pero o Real Oviedo empatou no último minuto grazas a un gol de Laura.
As asturianas preséntanse en Abegondo en situación complicada após a súa derrota a pasada fin de semana en Cáceres (2-1): son antepenúltimas (14ª posición) na clasificación de Primera Federación Iberdrola con 23 puntos.
Esta temporada lonxe de casa, o Real Oviedo, ademais da derrota co Cacereño, perdeu co SE AEM (3-1), RCD Espanyol (4-0), Córdoba CF (3-0), Rayo Vallecano (2-1), SD Eibar (1-0), UDG Tenerife B (1-0), FC Barcelona B (2-1), CD Alba Fundación (4-0), Granada CF (1-0) e DUX Logroño (2-1); empatou co CD Juan Grande Ginelux (1-1); e gañou unicamente ao Athletic Club B (0-1).
A centrocampista do Real Oviedo Femenino Ana Buceta comentou ao longo da semana que afronta o partido ante o Dépor ABANCA “con moitas ganas, esperando sacar os tres puntos”. Aínda que recoñece que “cada vez quedan menos partidos, menos opcións, aínda matematicamente é posible conseguir o obxectivo así que imos coas máximas ganas posibles e a por todas”.
Pola súa banda, a defensa do Real Oviedo Femenino Yannel Correa apunta que “o equipo segue coas mesmas ganas. Estamos a facer un bo traballo. Son partidos moi importantes. Cada un é unha final. Temos que afrontalo da mellor maneira posible”.
Do Dépor ABANCA opina que “é un rival complicado. Elas están a loitar para estar aí arriba e non nolo van a pór nada fácil. Pero nós temos que ir a por o noso xogo, manter a confianza no equipo e ir a por todas”.
Os pequenos detalles marcarán o partido, prognostica Joseba Aguirre
Joseba Aguirre, adestrador do Real Oviedo, afirma que durante a semana “as rapazas adestraron ben, con moita ilusión, con moitas ganas de dar unha alegría á afección. Imos contra o Dépor ABANCA con toda a ilusión para tentar sacar os 3 puntos. Contra o Dépor agardo vernos cun equipo que quere ascender. Os dous xogámonos moito será cuestión de pequenos detalles, pequenos acertos.
Espera ante un equipo deportivista que “quere ascender, un partido difícil no que os dous nos xogamos moito e que vai ser cuestión de pequenos detalles”.
Finalizado o encontro coas asturianas, está previsto que As Nosas deportivistas do Dépor ABANCA retornen aos adestramentos o luns 24 de abril ás 09:00 na Cidade Deportiva de Abegondo.
