Dúas semanas despois de perder en Madrid, o Dépor ABANCA ten a posibilidade de xogar o desquite co Rayo Vallecano, e achegarse aos postos de salvación. O partido, que se celebrará en Abegondo, será este sábado, 13 de marzo, ás 12:00 horas.
As branquiazuis chegan dunha vitoria e unha derrota nas últimas xornadas, a primeira co Sporting de Huelva e a segunda tras ter á Real Sociedad durante máis de 40 minutos sen anotar.
Por iso, os ánimos están altos no equipo que adestra Manu Sánchez. O obxectivo da permanencia vislúmbrase, pero o Dépor ABANCA aínda é colista. Con 14 puntos, logrados en catro vitorias e dous empates, as coruñesas están a dous da barreira da salvación, pero tres postos por debaixo dela na Liga Iberdrola.
Nunha situación distinta, aínda que non moito máis lonxe, está o rival desta fin de semana, o Rayo Vallecano. As madrileñas sufriron unha derrota na xornada 21, ante o Athletic Club por un competido 2-3, e tras este duelo ocupan a undécima posición, con 22 puntos e dúas vitorias e dous empates máis que as galegas.
Unha destas vitorias foi precisamente ante o conxunto herculino, na celebración do encontro adiado da sétima xornada.
O Dépor ABANCA sucumbe ante o Rayo Vallecano na segunda metade 3-1
As rivais máis fortes do Rayo Vallecano
Nesta xornada, as branquiazuis terán que estar atentas a xogadoras como Ana de Teresa, a segunda máxima goleadora do conxunto visitante, ou a Paula García e a Paula Fernández, que a seguen de preto na lista. Esta última foi a autora do primeiro gol do Rayo no partido celebrado en Madrid.
Quen tamén está na convocatoria é Sheila, responsable do terceiro gol do anterior enfrontamento entre estes dous equipos, e o que foi o seu único tanto esta tempada.
Porén, como admitía Iris Arnaiz en rolda de prensa, as previsibles baixas de xogadoras como Struck, Camila Sáez, Paula Andújar e Bulatovic, aínda que as dúas primeiras están convocadas, favorecen e moito ao Dépor ABANCA.
Independentemente de quen xogue finalmente sobre o céspede de Abegondo, as coruñesas teñen claro que irán a por todas e competindo con intensidade desde o primeiro minuto.
O calendario pónse costa arriba para o Dépor ABANCA
Este será un dos últimos encontros adquiribles que terán as deportivistas nas próximas semanas. Despois de xogar ante o Rayo Vallecano, que ten só oito puntos máis, as deportivistas visitan ao Logroño, rival directo pola permanencia.
A partir de aí o calendario branquiazul ten anotados os encontros con rivais da talla do Real Madrid, Atlético de Madrid, Barcelona, Valencia ou Madrid CFF, todos eles do posto noveno para arriba.
