A festa do Dépor ABANCA adíase. As Nosas deportivistas quedaron a un gol do ansiado ascenso. O retorno á elite do futfem estatal deberá pasar, se acontece, polo play-off para o que as galegas están clasificadas. O conxunto coruñés rematou en táboas (0-0) o seu partido contra o DUX Logroño. De ter gañado, aínda que fose so por un gol, terían ascendido.
O Dépor ABANCA quedou a un só gol de retornar á máxima categoría estatal do futfem, pois unha vitoria sería suficiente para as futbolistas que adestra Irene Ferreras trala derrota do CDF Osasuna Feminino en Cáceres e o empate da SD Eibar en Granada.
Deste xeito, o SD Eibar logra o ascenso directo e as deportivistas deberán disputar a semifinal do play-off ante o CP Cacereño Femenino. No caso de superar esa eliminatoria deberían loitar polo ascenso na final ante o vencedor da outra eliminatoria, entre CDF Osasuna Femenino e Granada CF. Ambas as roldas dispútanse a dobre partido.
#AsNosas xogarán a semifinal do playoff de ascenso a #LigaF contra o CP Cacereño Femenino.
Parabéns ao @SDEibar polo seu ascenso á máxima categoría. pic.twitter.com/WJSeiF3u7I
— RC Deportivo (@RCDeportivo) May 14, 2023
O Dépor ABANCA non foi capaz de ver porta na Ciudad del Fútbol de Pradoviejo. A cousa non empezou demasiado ben cando, aos 45 segundos, a marfileña Ida Guehai fíxose cun mal pase atrás da zaga coruñesa e no man a man con Yohana, con todo a favor, disparou fóra.
O primeiro achegamento do Dépor ABANCA, que controlou o xogo pero careceu de profundidade, chegou no minuto 13, por medio dun disparo afastado de Henar que se foi por riba do traveseiro. A mellor ocasión coruñesa chegou no minuto 17. E non foi unha soa ocasión, senón tres. Millene disparou de socato e a porteira despexou o coiro, que caeu a pés de Laura Fernández. O remate da ’10’ sacouno unha defensa baixo paus. Ainhoa Marín recolleu o rebote e volveu pasar o balón cara a Laura pero Belem interpúxose para despexar a córner.
Aos 20 minutos, a colombiana Marcela Restrepo disparou desde 20 metros. Yohana respondeu con seguridade desde a portaría do Dépor ABANCA.
Na segunda metade, os achegamentos a portería foron aínda menos. Millene enviou o esférico ás nubes a centro raso desde a dereita de Ainhoa Marín, no minuto 55.
Cambios no Dépor ABANCA que modificaron o debuxo
Irene Ferreras moveu o banco coa entrada de Charle por Laura Fernández á hora de xogo. O cambio non produciu modificacións tácticas, xa que a soriana ocupou a posición de mediapunta.
O dominio coruñés unicamente traduciuse en infinidade de saques de esquina. Nin Paula Gutiérrez nin despois Sara Navarro conseguiron colocar algún deses centros na cabeza dalgunha compañeira para crear perigo ante a meta rival.
O DUX Logroño gozou das máis claras ocasións nos minutos finais. No minuto 79, Yohana detivo con seguridade unha falta afastada lanzada por Olga García. Un minuto despois, a porteira branquiazul saíu providencialmente para tapar o remate da surafricana Leandra Smeda após peitear unha falta de Ida Guehai.
Consumiuse o tempo e o marcador non se moveu. Táboas na Ciudad del Fútbol de Pradoviejo e o Dépor ABANCA queda a un gol do soño do ascenso directo.
Toca pensar xa no seguinte asalto ao retorno á elite. Será a vindeira fin de semana visitanndo ao Cacereño Femenino no partido de ida de semifinais desta fase de ascenso a Primera División do futfem estatal.
FICHA TÉCNICA
0) DUX LOGROÑO: Poza, Iria Castro, Annelie Leitner, Belem, Laura Martínez, Leandra Smeda, Aixa Salvador (Valderas, min. 87), Olga García (Sofía, min. 89), Restrepo, Amani Kahounan e Ida Guehai.
0) RC DEPORTIVO ABANCA: Yohana, Cris, Inés Altamira, Raquel García, Samara, Paula Gutiérrez, Henar, Ainhoa Marín (Carlota Sánchez, min. 86), Laura Fernández (Charle, min. 61), Eva Dios (Sara Navarro, min. 72) e Millene.
GOLES: Sen goles.
EQUIPO ARBITRAL: Ane Asla Borrallo (colexio vasco). Amosaron cartón amarelo a Restrepo (min. 45+1), Paula Gutiérrez (min. 79) e Belem (min. 84).
INCIDENCIAS: Partido da 30ª e última xornada de liga regular na Primera Federación Ibredrola disputado na Ciudad del Fútbol de Pradoviejo en Logroño.