O Dépor ABANCA ten un fortín en Abegondo do que non escapan os puntos. As xogadoras branquiazuis sumaron na décima xornada da Reto Iberdrola a súa sexta vitoria como local, desta vez derrotando por un 2-0 ao Oviedo Moderno CF.
Os goles de Inés Altamira e Jone Ibáñez no tramo final de partido deixaron os tres puntos do triunfo en casa, despois dun partido igualado ante as asturianas.
Superadas na primeira parte
O Oviedo Moderno saltou ao verde de Abegondo con convicción e disposto a poñerlle as cousas difíciles ás pupilas de Miguel Llorente. O conxunto asturiano apostou por unha presión alta para meter ao Dépor ABANCA en apuros e conseguiu por momentos ter ás locais repregadas.
As ocasións das galegas neste primeiro tempo contábanse cos dedos dunha man, sendo as máis destacadas as de Laura Fernández e María Ruiz. Co paso dos minutos, as deportivistas facíanse fortes en casa, aumentando a posesión e controlando así o ritmo do encontro.
O Oviedo seguía xerando oportunidades de anotar, cos disparos de Irantzu e de Carlota Suárez, que porén non entraron na portería de Valles. Antes da pausa, branquiazuis como Ale Serrano ou María Ruiz tras unha xogada iniciada por Altamira e Carlota, estiveron preto de adiantar ao Dépor ABANCA.
Dominio final na segunda metade
As boas sensacións coas que as coruñesas despediron a primeira metade manifestáronse no inicio da segunda, pero mantendo o escaso acerto ante a porta rival. De novo Alejandra Serrano foi a que mellor ocasión tivo de romper o 0-0, pero o seu disparo no minuto 52 deu no traveseiro.
O equipo adestrado por Llorente non remataba de transformar as accións de ataque, pero mantíñase tranquilo no apartado defensivo, dándolle pouco traballo por facer a Ana Valles.
Pouco a pouco, o Dépor ABANCA foi marcando o camiño para un tramo final que remataría por darlle a vitoria. No minuto 77, María Ruiz estivo preto de chegar ao centro lanzado por Aroa Guerra. Minutos despois, Jone Ibáñez intentouno cun lanzamento que rematou lonxe.
A presión branquiazul continuou cun centro de Cris que Altamira aproveitou para rematar coa cabeza e asinar así o primeiro gol coruñés da tarde. Tan só houbo que agardar cinco minutos para o segundo tanto, obra de Ibáñez tras recibir un centro raso de Ainhoa Marín.
Sen tempo para a reacción asturiana, as galegas asinaron a súa sexta vitoria como locais, manténdose en segunda posición a só dous puntos do Levante Las Planas. Na vindeira xornada, as deportivistas visitarán ao Racing Féminas.
Fiiiiinaaaaal en #Abegondo do #DéporABANCAOviedo, 2-0!
🦋 #VoemosXuntas 💙 #MoitoPorVivir pic.twitter.com/Ojijl5FiKw
— RC Deportivo (@RCDeportivo) November 20, 2021
FICHA TÉCNICA
DÉPOR ABANCA: Ana Valles, Cris, Inés Altamira, Raquel García, Andrea Sierra (Patri López, min. 78), Paula Gutiérrez, Carlota, Ainhoa, Alejandra Serrano (Jone Ibáñez, min. 69), María Ruiz e Laura Fernández (Aroa Guerra, min. 61).
OVIEDO MODERNO CF: Miralles, Alejandra, Yannel Correa, Iglesias (Rocío, min. 90), Yarima Font (Osorio, min. 79), María Requena, Isina, Marina Crespo (Denise, min. 90), Lucía Vallejo, Carlota Suárez (Ana Buceta, min. 79) e Irantzu (Carla Gómez, min. 69).
GOLES: 1-0 Inés Altamira (min. 82); 2-0 Jone Ibáñez (min. 87).
ARBITRAXE: Rodríguez Campos (colexio galego). Sacoulle tarxeta amarela a Iglesias (min. 74) e a María Ruiz (min. 90+2).
INCIDENCIAS: Partido correspondente á 10ª xornada de Reto Iberdrola disputado en Abegondo ante 200 espectadores.
