Como un furacán comezou o partido o Dépor ante o Espanyol na Cidade Deportiva Dani Jarque. As branquiazuis levaban desde o primeiro día de decembro sen saborear as meles da vitoria (2-1 ante o Sevilla). Manu Sánchez deixou no banco a Tere Abelleira e a Alba Merino, dúas xogadoras que estaban a ter moitos minutos e dous pesos pesados do vestiario. Revolución no once para reecontrase coa vitoria. No seu lugar entraron de inicio Kika (primeira titularidade da tempada) e Maya (segunda titularidade).
A xogada saíulle a pedir de boca a técnico galego e xa no minuto 21 o electrónico reflexaba o 0-2 a favor das coruñesas. Dobrete de Gaby. E puido ser máis se non fose anulado un gol a Peke preto do minuto 23 por fóra de xogo da dianteira vasca.
O partido estivo dominado case desde o principo ata o final polas herculinas, agás os 15 minutos finais da primeira parte no que o conxunto catalán apretou. O Espanyol, pechacancelas da categoría, sufriu a presión e o ansia de querer anotar.
Triplo troco de Jordi Ferrón antes do descanso
As xogadoras dirixidas por Jordi Ferrón, non atopaban o seu sitio no campo e foron superadas polas galegas. O adestrador catalán, nun intento por cambiar o signo do encontro e buscar unha reacción das súas, fixo un triplo troco cando corría o minuto 34 e o Dépor xa ganaba por dous goles a cero. Obras da venezolana Gaby.
Os trocos serviron para dar un aire fresco ao equipo local, pero a súa acción máis perigosa foi unha chegada en fóra de xogo. Na segunda parte, continuou cunha presión alta sobre a saída de balón de do Dépor pero non xurdiu o efecto deseado por Ferrón.
Sentencia de Kika e debut de Carlota
O conxunto galego acabou por matar o partido no minuto 58, cando Iris atopou un espazo de pase entre a defensa rival para filtrar o esférico á área, que recolleu Kika e rematou para bater a Miriam. 0-3 e partido resolto para as herculinas.
Co partido sentenciado o Espanyol buscou o gol da honra a través de varias xogadas de perigo de Julve e Kenny, pero Misa non baixou a garda en ningún momento.
Mentres Manu Sánchez empezaba a mover o banco, o Espanyol seguiu buscando ese gol cun remate alto de cabeza de Eli do Estal ou unha falta de Torrodá que deu no traveseiro e rebotou no chan pero fóra da liña de gol. O Espanyol reclamou como gol pero as colexiadas indicaron que o balón botara fóra. Ademais, Misa reaccionara moi rápido no rebote, como nunha posterior gran xogada de Baudet.
O Dépor ABANCA tivo a posibilidade de ampliar a renta tras unha oportunidade moi clara de Peke a pase da debutante Carlota pero o remate fóiselle á esquerda da portería do conxunto catalán.
O partido morría cunha oportunidade das locais, nunha ocasión que salvou Iris a córner tirándose ao chan cando ía rematar Ayaka soa ante Misa. Córner sen perigo que atrapou a gardameta por alto para poñer o punto final ao primeiro partido dunha segunda volta que comezou como a primeira, con vitoria fronte ao Espanyol de Jordi Ferrón.
As galegas consiguen unha vitoria despois de tres encontros sen gañar e consolidan a súa gran estrea na máxima categoría. Tras varios partidos xogando fóra da casa, o Dépor recibe ao Betis en Abegondo na vindeira xornada.
Dépor, equipo revelación da tempada para LaLiga
Cumprida a primeira volta do campionato na Primeira Iberdrola, LaLiga, a través da súa páxina web oficial nomeou ao Deportivo ABANCA como equipo revelación da tempada.
“Recentemente ascendidas na categoría, pero coas ideas tan claras que parecen veteranas”, sostén a publicación oficial. Apunta ademais que “o Dépor ABANCA de Manu Sánchez conseguiu enganchar a todos os afeccionados do fútbol nesta primeira volta. Non só polos resultados, senón polo gran xogo despregado en todos os campos da competición”.
Cun partido menos, o da Real Sociedade en Abegondo aprazado o pasado 21 de decembro polo temporal, as deportivistas marchan na 4ª praza con 24 puntos; só superadas por FC Barcelona (40 puntos), Atlético de Madrid (33 puntos) e Levante VDE (29 puntos).
FICHA TÉCNICA
ESPANYOL: Mimi, Débora (Kenni, min. 62) , Inés, Soldevila, Dulce (Ayaka, min. 33), Letti, Torrodá, Baudet, Ainhoa (Julve, min. 33), Paloma (Eli del Estal, minn. 33) e Brenda.
DÉPOR ABANCA: Misa, Cris, María Méndez, Villegas, Nuria (Érika, min. 85), Maya (Alba, min. 78), Iris, Kika, Gaby, Peke (Michelle, min. 82) e Athenea (Carlota, min. 63).
GOLES: 0-1 Gaby (min. 14); 0-2 Gaby (min. 21); 0-3 Kika (min. 58).
COLEXIADAS: Cebollada López, Paola (c. Aragonés) Sen amonestacións.
INCIDENCIAS: Partido da 16ª xornada da Liga Iberdrola deputado na Cidade Deportiva Dani Jarque.
