Por primeira vez despois de nove xornadas como locais, o Dépor ABANCA perdeu un partido da presente tempada en Abegondo. As branquiazuis recibían en casa ao CA Osasuna, un equipo que xa lle puxera as cousas complicadas no partido de ida, e que desta vez, cun gol de Lorena, fíxose cos tres puntos (0-1).
Con este resultado, as galegas, que forman o mellor equipo local da categoría, perden o liderado ante o Levante Las Planas. As catalás suman coa súa contundente vitoria ante Seagull 38 puntos na táboa, un máis que as coruñesas.
Primeira parte sen ideas
Desde os primeiros minutos de partido, a alta presión do Osasuna puxo en perigo ao Dépor ABANCA, con Sampalo baixo paos evitando o gol visitante.
As branquiazuis tamén tiveron a súa ocasión en forma de córner tirado por María Ruiz, que porén rematou nas mans de Maitane Zalba. Inés tamén tivo a súa, pero sen sorte.
Co paso dos minutos, as coruñesas collían ritmo no seu verde, e a mellor oportunidade de marcar chegaría no minuto 25. Nunha gran xogada colectiva, Ainhoa Marín deixoulle o esférico a Patri López para disparar a porta, aínda que a porteira do conxunto navarro non fallou e desviou o tiro.
O marcador estrenouse pouco antes do descanso, no minuto 37, cun gol de Lorena Herrera para o Osasuna, poñendo o 0-1.
Segunda metade sen acerto
Despois do paso por vestiarios, o Dépor ABANCA fíxose co control do balón, mentres que o Osasuna sabía esperar paciente a súa ocasión. Minutos despois da reanudación, Paula puido abrir a lata branquiazul cun pase a Sierra, pero esta foi derribada con penalti para as galegas.
María Ruiz foi a encargada de lanzalo, pero a pelota foi despexada a saque de esquina por Maitane. Co tempo e o marcador en contra, as branquiazuis seguían loitando polo empate.
Entón, as xogadoras de Miguel Llorente apostáronno todo no ataque, adiantando as súas filas en busca do gol. Xa no 61 chegaría a xogada da polémica. Aroa Guerra anotou un tanto que sería anulado polo colexiado tras o aviso da árbitra asistente de que o balón saira pola liña de fondo no centro de Marín.
No tramo final, Sampalo salvou varias ocasións impedindo que o Osasuna collera vantaxe, pero as accións defensivas non se viron recompensadas nos ataques. Malia intentalo ata o final, o Dépor ABANCA non puido salvar o partido, perdendo por este 0-1.
FICHA TÉCNICA
DÉPOR ABANCA: Sampalo, Cris, Inés Altamira, Raquel García, Andrea Sierra, Paula Gutiérrez, Carlota, Ainhoa Marín, María Ruiz, Patri López e Alejandra Serrano (Aroa Guerra, min. 46).
CA OSASUNA: Maitane Zalba, Carmen Fresneda, Josune, Aitana, Saioa, Celia, Anita, Lorena Herrera (María Blanco, min. 80), Maitane Vilariño (Herrero, min. 89), Iara e María González (Patricia Zugasti, min. 68).
MARCADOR: 0-1 Lorena Herrera (min. 37).
ARBITRAXE: Adrián García Rodríguez (colexio galego). Sacoulle tarxeta amarela a Carmen Fresneda (min. 43), Inés Altamira (min. 79) e Iara (min. 81). Expulsou con vermella directa á delegada do CDF Osasuna, Maitane Sanzol.
INCIDENCIAS: Partido correspondente á 17ª xornada do grupo Norte de Reto Iberdrola disputado na Cidade Deportiva de Abegondo.
